Aizawl tui tlan Tlawng lui a nu fo a, pump chi loh khawpin a nu thin. Tun hnaiah pawh a nu leh a, tui pump hna pawh an chawl leh.
May thla tir lamah khan pump tlak loh khawpin Tlawng lui hi a lo nu tawh a, thla tawpah a nu leh. Thawhlehni pawh khan an pump lo.
Greater Aizawl Water Supply Scheme Phase I leh Phase II hmangin Tlawng lui hi PHE department-in an pump a, Aizawl mipui hnenah an sem leh thin. May ni 2 (Zirtawpni) zanah ruah surah khan Tlawng lui hi namen lovin a nu a, tui lak hna pawh an chawlh phah. May ni 26 zana ruah surah khan a nu leh a, a tukah tui lak hna an chawl leh.
PHE department hotute sawi danin, tui hi NTU (Nephelometric Turbidity unit) 5 hnuai lam an sem thin a, lui tui hi NTU 5 chung lam ni sa mah se NTU 5 hnuai a nih theih nan an tifim thin. May ni 27 chawhnu dar 2 velah khan Tlawng lui hi NTU 846 te a ni a, tihfim chi-ah an ngaih loh avangin a pump-tute an chawl a ni.
PHE department hotute chuan May ni 26 zan atangin tui hi a nu tih an sawi a, ni 26 zan dar 11.20 vel atangin a pump hna hi an chawl tih an sawi.
May ni 2 zana ruah surah Tlawng lui a nut khan a tukah tui pump hna hi an lo chawl tawh a, May ni 3 tukah khan NTU 984 te a ni. May ni 4, Chawlhni lamah a zia ta a, NTU 600 velah a tla thla.
Tun hnaiah Tlawng lui hi namen lovin a nu thin a, nikum khan NTU 1000 chuang a ni fo. Kuminah pawh April ni 17-20 chhung khan NTU 1000 chuang a ni fo.
PHE department chhinchhiah danin, hun pangngaiah Tlawng hi NTU 100 hnuai a ni thin a, lui tui NTU 100 hnuai chu fim tak a ni. Mahse tun hnaiah ruah a sur hian a bul vela bawlhhlawh leh leivung a len lut a, a nu ta vak mai thin a ni. A kam velah leh a luiah bawlhhlawh leh leivung paih an awm thin a, leimin leh ko pang bal te chu inven theih lohvah ngaih a nih pawhin bawlhhlawh leh leivung paih hi chu sim theih a ni tih an sawi a, inven sen a nih loh thu leh Tlawng lui a fim theih nan tan tlan a ngaih thu te PHE department hotute chuan an sawi.
Aizawl tui tlan Tlawng a nu leh
Get real time updates directly on you device, subscribe now.