Aizawl tuilakna 37 MLD leh a behbawm

Aizawl khawpui chawmtu tur tui lakna thar ‘37 MLD Water Treatment Plant’ chu nimin atang khan hman theihin deputy chief minister Pu Tawnluia chuan a hawng a. He tuilakna thar hian ni tin tui litre maktaduai 37 pump chhuak theiin mipui 4,45,000 a chawm zo thei tura ngaih a ni. Hetianga khawpui mipui chawmna tur tuilakna thar hman theih tura hawn a lo ni thei ta hi sawrkar tan achievement ropui tak, mipui tana lawmawm tak a ni.
Aizawl tuilakna GAWSS phase-I kha 1988-a hman tan a nih khan 10.8 MLD a ni a. A hnuah kum 2007 atangin GAWSS phase-ll, 24 MLD kha hman tan a ni leh a. Kum 16 zet a vei leh hnuah tunah hian tuilakna hmasa pahnih belhkhawm aia tam zawk (37MLD) tui lak theihna kan nei thar leh ta a. Heti hian, tuilakna pathum belhkhawm hi 71.8 MLD a lo ni ta a, Aizawl mipui nuai li vel hian hnianghnar takin tui hi kan nei thei tawh dawn tihna a ni awm e.
He Plant thar hi sawrkar hmasa hun laia bul tan kha a ni a, sawrkarna a inthlak a, a hnua sawrkarna fawng chelhtuin mipui tana pawimawh, ram asset tur a ni tih hriain theihtawp chhuahin a hlawhtlinna hmel hmuh a lo ni ta a. Tuna sawrkarna chelh mektute pawhin he tuilakna bul lo tantu sawrkar hmasa hmalakna hre renga credit a pe thei hi mipui tan chuan thil hriat nuam tak a ni.
Hetiang deuh bawk hian, medical college din chungchangah pawh, a hlawhtlinna atana theihtawp lo chhuahtu sawrkar hmasa hmalakna chu a hnua sawrkarna fawng chelhtu ten hriatpuina (appreciation) phur takin an pe thei a, hei hi thil lawmawm tak a ni. Sawrkar hmasain ram leh hnam tana hna pawimawh a lo thawhte chhunzawm theitu sawrkar hian fak leh chawimawi a phu bawk. Ram hnuk khawih thilah hi chuan party politics dah thaa thawh ho thiam hi a pawimawh a, chu chu ramin a mamawh a ni.
Tunhmaa sawrkar hmasa thiltih, a hnua sawrkar dangin thawh zawm tum lova an hluihlawn thin ang kha chu tun hnuah hi chuan thleng tawh lo se a duhawm hle a ni.