Aizawlah Assamese Kut hmang

Aizawlah Assamese Kut hmang
Assamese ho Kutpui ber, Rongali Bihu chu May 10 khan hman a ni a. Mizoramah pawh Assamese-ten an lawm a. Assembly speaker Lalbiakzama’n a hmanpui.
Speaker chuan hmarchhak unau pasarihte inlungruala inpumkhat turin Assam state a pawimawh tih sawi a. Rongali Bihu chu Assamese-te tana kumthar lawmna, buh seng lawmna hun leh inpumkhatna Kut a ni, tiin, he hun lawmawm kaltlangin hian Assamese-te chu hmarchhak unau pasarih inpumkhatna atan hmahruaitu ni turin a sawm a ni.
Mizoram-in Kut pawimawh pathum – Chapchar Kut, Mim Kut leh Pawl Kut an lawm thin a. Bihu leh Chapchar Kut phei chu agriculture lam kaihhnawih niin, a hun dang hret mah se a inzul thawkhat nia a hriat thu a sawi. Assam chu India hmarchhak tan agriculture-a hmahruaitu an nihnaah lawmpuiin, hmarchhak tan buhzem ni chhunzawm zel turin duhsakna a hlan tih a sawi a ni.
Rongali Bihu hi Bohag Bihu tih nen a thuhmun a. He hun hi Assamese-te tan chuan an buhseng hun a ni thin a, kum bul chhiar tanna atan an hmang bawk.
Kut lawmnaah hian Mizoram University vice chancellor Prof. Dibankar Deka bakah Assam Cultural Society atangin Aizawla awm Assamese-te an tel a ni.