Aizawlah Environment Day hmang

Mizoram Pollution Control Board (MPCB) buatsaihin Thawhtanni khan Aizawlah World Environment Day 2023 hman a ni.
He hun hmanpuitu, conservator of forest (CC) Lalrammawii Sailo chuan ram hruaitu hmasate pawhin Environment Day hi an ngaipawimawh hle a, vawiin thlengin ruahhmanna siam chhoh zel ala ni tih a sawi a. ‘Beat Plastic Pollution’ tih thupui chu a vawihnihna atan hman leh a ni tih sawiin, thupuia hman nawn ngai tawh lo tura plastic bawlhhlawh tih tlem chu kan tum ber ni se tih a sawi.
Plastic hnawm kan nei tam lutuk chu kan chhehvela cheng ramsate leh luia cheng nungchate pawhin tuarin an thih phah nasa a, mihringte thlengin kan hriselna a tichhia a, kan thihpui nasa tawh hle tih conservator of forest hian a sawi a. Energy renchem lamah pawh hma lak thar a ngai tih sawiin, “Hote anga lang – tui ren, electric ren, kea kal tam leh ruahtui khawl thatte hi a pawimawh hle a ni,” a ti. Sarang leh polythene lam vawikhat hmana kan paih nghal mai chite chu sawrkar phal tawh loh thil a nih bakah kan khawvel tichhetu an ni tih hre nawn turin mipui a chah a. Environment humhim nana man tlawm ber pawl thing phun uar deuh deuh chu a pawimawh hle tih a sawi bawk.
MPCB hian World Environment Day hi May thlatir atang khan Mission LiFE hnuai atangin a hmang chho tawh a, Aizawl leh district dangah environment humhalh tulna leh plastic hnawm titlem tura mipui hrilhhriat bakah environment tichhe thei bawlhhlawh thenfai leh sawngbawl lam thawkin hnatlang neih a ni. Hemi lam hawi bawk hian intihsiak pali – thlalak, hnawm atanga thil tangkai siamte phochhuahna, lemziah siak leh online-a quiz intihsiak buatsaih a ni a. A titha thlanchhuahte hnenah lawmman sumfai leh thuziak hlan a ni.
World Environment Day hmannaah hian sawrkar department hotute leh zirlaite an tel a. Mission LiFE programme hnuaiah MPCB leh National Institute of Technology Mizoram tangduin National Level Hackathon on Waste Reduction an buatsaih tur chu sawifiah a ni a. Kalkhawmten environment tichhe lo tur leh humhim turin thu an tiam rual a ni.