National Institutional Ranking Framework (NIRF) in India rama institution tha tehna a siam atangin a that dan indawt a tichhuak a. University category-ah Mizoram University chu 76-na niin, college huangah Pachhunga University College chu 34-na a ni.
Sawrkar laipui Ministry of Education-in tehna hrang hrang hmanga India rama institution tha zual 200 a thlan thinah kumin atan ranking hi tichhuak tharin, university ah Indian Institute of Science Bengaluru chu pakhatna a ni a, a point score hi 83.16 a ni. 2-na Jawaharlal Nehru University Delhi chuan 68.92 a score a, 3-na Jamia Millia Islamia Delhi-in 67.73 a hmu ve bawk.
India hmarchhaka university zingah Tezpur University Assam chu a sang ber a, 69-na niin 46.70 a score a; a dawtah Mizoram University awmin 76-na a ni a, 45.18 a score. 80-naah North Eastern Hill University Meghalaya a awm a, 44.95 a score a ni. Gauhati University Assam chu 88-na a ni a, 44.10 a score a; an ni pali bak top 100-a lang pha hmarchhak atangin an awm lo. Top 100 chunglam, top 200 huangah erawh Assam University Silchar Assam, Dibrugarh University Assam, Manipur University, Sikkim Manipal University, Central Agricultural University Manipur, Sikkim University, University of Science and Technology Meghalaya te an lang ve a ni.
Mizoram University hi NIRF ranking 2022-ah 78-na a ni a, step hniha hma sawnin 76-naah a chho a ni.
MZU constituent college Pachhunga University College chu College Category ah 34-na a ni a, pakhatna chu Miranda House Delhi niin point 74.81 a score a; 2-na Hindu College Delhi-in 72.39, Presidency College Tamil Nadu-in 71.18 a score a ni. 9-naah point inang hmu an awm tih loh chu top 100 huanchhungah Pachhung University College leh Bishop Heber College, Tiruchirappalli Tamil Nadu ten point 59.15 ve ve score-in 34-naah an awm dun a, PUC hi India hmarchhak college atangin top 100-a lang awmchhun niin, top 150 chunglamah Patkai Christian College Dimapur Nagaland a lang ve bawk.
Kuminah college tha 200 thlanchhuah tura endik zingah India ram puma college 2746 an tel a, kum kalta aiin 474-in a pung. Hmarchhak bikah college 162 an tel a, a tha 200 thlan zingah pahnih chauh an lang pha a ni.
Indian Institutional Ranking Framework (IIRF) chuan tehna hrang hrang a siam atangin India rama institution tha a lo thlangchhuah ve tawh bawk a, central university bikah Mizoram University chu 13-na a ni a, India hmarchhakah a sang ber.
NIRF leh IIRF hi a inang loa, NIRF hi ngaihhlut ber ni mah se, IIRF pawh hi coporate industry huangchhungah te chuan an ranking siam hian awmze thui tak a nei thin tih sawi a ni. Hei lo pawh hi ram pum huap instution tha thlan dan dang ala awm bawk.
NIRF ranking-ah hian university, college, research institution, engineering, management, medical, dental, law, architecture and planning, agriculture and allied sectors leh a dangte chu a hran theuhin a tha zual a thlang a, a hranin overall ranking a siam leh a ni.
University thaah MZU 76-na College thaah PUC 34-na
Get real time updates directly on you device, subscribe now.
Prev Post