Aizawlah gas home delivery titha lo veng 9 vel an la awm
Aizawl Municipal Corporation huamchhungah eirawngbawlna gas latute an chenna ina dah (home deliver) tura tihna la kalpui tha thei lo veng 9 vel chauh an awm tawh a. State Consumer Disputes Redressal Commission (SCDRC) Mizoram chuan home delivery hi zaah za kalpui turin a hriattir nawn. SCDRC Mizoram-in AMC huamchhungah leh district headquarters tinah gas home delivery ti vek tawh tura gas distributor-te a hriattir (order) tawh hnu ah la kalpui that lohna a awm nia hria in Mizoram Consumer Union Gen. Hqrs. chu Commission-ah hian a zualko leh a, Thawhlehni khan hearing neih niin, AMC huamchhunga distributor awm zawng zawng – 12 aiawh an kal a, MCU hruaitute an tel bawk.
MCU hian gas home delivery ti tura hma a laknaah kum 2015 khan SCDRC-ah hian a lo zualko tawh a, rei tak chhung a inchiah hnu ah 2023 October khan Consumer Court hian judgement order tichhuakin AMC huamchhungah leh district headquarters tinah home delivery ti vek turin distributor-te hi a hriattir a ni.
Hemi hnu, kumin March – April atang khan home delivery ti tura hma lak zui ni mah se, distributor tam zawk chuan an bawhzui tha lem lo nia hriat a ni. MCU chuan Commission-ah hma lak that a nih loh thu hi a thlen leh ta a ni.
The Aizawl Post-in a biaknaah MCU Gen. Hqrs. president Thanglura chuan, distributor zingah hma la tha awm mah se, a tam zawkin court thupek an zawm tha lo nia hria in an zualko leh a; Commission hian home delivery kalpui vek turin a ti a, distributor tin chu an perfomance thehlut tura a tih bakah MCU pawh pe ve turin a ti tih a sawi.
“AMC huamchhungah chuan home delivery hi an ti deuh vek tawh a, veng 9/10 velah chauh la kalpui that lohna a awm. An kalpuinaah pawh duhthusam ni lo deuh an awm avangin Commission hian tha zawka kalpui turin a ti. IOC Ltd marketing discipline guidlines sawi angin, lirthei leh delivery boy mamawh zat ang ruahman turin MCU chuan kan phut a ni,” a ti.
Thudawn danin Consumer Court (SCDRC) thu zawm tha lo hi sumfai cheng nuai khat thleng an chawitir theih bakah warrant of arrest an issue thei a, lung in tan thlengin hma an la thei. Tunhnaiah pawh gas distributor pakhat chu Commission-in a koh tum 3/4 lai a chhan duh loh avangin sumfai chawitir a ni tih sawi a ni.