Aizawlah home voting April 8-ah Lunglei district-ah kalpui tan tawh

Election Commission of India (ECI) in Lok Sabha inthlanpuia vote thlak tura polling station pan thei lo, kum 85 chung lam (senior citizen), Covid-19 vei mek leh vohbik (person with disability – PwD) te tana postal ballot hmanga mahni inchhunga vote thlak theih dan (home voting) a ruahman angin, Aizawl district ah chuan April 8 atanga tih tan tur a ni a, a ti hmasa ber Lunglei district-ah kalpui mek a ni.
Tun inthlanpui atana returning officer, Aizawl district election officer ni bawk Nazuk Kumar sawi danin, Aizawl district bikah chuan April 8, 9 & 10 hian home voting ti tur tan vote thlak a ni dawn a. MLA inthlanpuiah khan home voting atan kum bithliah hi kum 80 chunglam tih a ni a, tun tumah chuan 85 chunglam a ni tawh thung. Rualbanlo tehna hi 40% pianphunga rualbanlote an ni dawn a, election official-ten hemi tura hming pete hi an inah an kalchilh dawn a ni. Home voting ti thei tur hi Aizawl district-ah 874 an awm a, an zinga 54 hi PwD niin, 820 chu kum upa an ni.
Vote tla a that theih nan theihtawpin hma an la tih Nazuk Kumar hian a sawi a. Heti lam inzirtirna atan April 3 khan Art Exibition neih tan niin vawiin – April 5 thleng a awh dawn. April 6 hian Millenium Centre-ah vote thlak that tul zia inzirtirna neih pahin street concert neih a ni ang.
Inthlan hma zawngah I-League club Aizawl FC-in home match an neih apiangin vote thlak tura inzirtirna hun hman thin a ni dawn a; April 11 hian bike rally neih tur niin, Aizawla vote tamna ber Zemabawk-ah vote thlak tura inzirtirna hun hi buatsaih tum a ni. Aizawl City Bus nen an thawkdun dawn tih a sawi bawk.
Postal ballot bik hi district dang pawh Aizawlah vek chhiar tur a ni a, a bika chhiarna hmun siam a ni ang. Zarkawt Polling Station-a booth -II chu PwD hlangin an enkawl dawn a ni.
Home voting kalpui hmasa ber district, Lunglei district chuan Ningani atang khan an nei tan a. Zobawk, Rahsi Veng, Rualalung leh Buarpuiah neih hmasak a ni a. Home voting diltu mi 55-te dilna pawmsak vek niin, kum upa 45 leh PwD 10 an ni.
Home Voting buaipui turin ECI duh dan angin Polling Official 2, Videographer leh Police awmna team 4 din an ni a, heng team te hian 4th April 2024 atangin Lunglei District hmun hrang hrangah Home Voting an kalpui tan a ni.
Home voting neihnaah hian booth level officer-ten a tul angin ruahmanna an siampui a. Political party aiawhten an duh chuan ‘secrecy of voting’ bawhchhe si loin an lo thlir (observe) phalsak an ni. Uluk takin videographer ten ‘secrecy of voting’ bawhchhe loin an lo ‘record’ vek bawk.