Aizawlah IGNOU Convocation hmang

Indira Gandhi National Open University (IGNOU) Convocation vawi 37-na chu Thawhlehni khan India ram pumah hman a ni a. Aizawlah chuan IGNOU Regional Centre Selesihah minister Vanlalhlana hoin hman a ni.
Thawhrimna leh taimakna rahchhuaha zirlaiten degree, diploma leh certificate an dawng tur chu a lawmpui tih minister hian a sawi a. Zirna chu duhtawk san mai loa inzir reng turin a chah. Dinhmun harsatna avanga zirna sang zawk zir chhunzawm thei lo tur tam tak IGNOU zara inzirchhuak an awm thin leh course hrang hrang zir tur a awm chu thil lawmawm tak a ni, tiin, an thil dawn chu khawtlang tana hmang a, a tha zawnga danglamna thlentu ni ngei se a duh tih a sawi bawk.
Zirlai hlawhtlinna chang – master degree 580, bachelor degree 561, PG diploma 46, PG certificate 5, diploma 4 leh certificate 47, an vaiin mi 1243 hnenah degree, diploma leh certificate hlan a ni.
IGNOU Regional Centre Aizawl hi kum 2000-a din tan a ni a, Selesihah hmun nei tawhin thawktu mi 8 an awm mek. Mizoram district 10-ah inzarphahin Learner Support Centre 24 leh academic counsellor 201 an awm. CCH programme hnuaiah zirlai 324 awmin 100% zirlai admit an ni a. An vai hian community health officer-a chhawr vek niin, hei vang hian Mizoram Information & Communication Technology department chuan 2023 May 12 khan Government Online Excellence Award a lo hlan tawh a ni.
Delhi-ah chuan IGNOU Convocation hi India vice president Jagdeep Dhankar hoin hman a ni a. An hun hman lai hi inbiak hmuhtheihna hmanga thlirho a ni.