Aizawlah Olympic Day Run nei

International Olympic Day 2026 pualin Mizoram Olympic Association chuan Thawhlehni khan Olympic Day Run leh Plantation Drive a buatsaih a. Infiammi 631 chuan Chanmari kawn, Dinthar leh Sikulpuikawn atangin Lammual an pan khawm.
Lammuala hmanpuitu Environment Forest & Climate Change minister Lalthansanga chuan, environment thatna state chu state hausa an ni, tiin, thing phun leh ramngaw humhalh ngaipawimawh turin mitin a chah a. Infiammite chu inzahtawn a, hun vawng dik a, mahni inthunnun leh dawhthei turin a chah.
Sports & Youth Services minister Lalnghinglova Hmar pawhin, Olympic Day puala Olympic Day Run hman a ni thin chu tha a tih thu sawiin, Mizoram chu a hminga Olympic Day lo zawm ve tu mai ni loa, Olympic-ah Mizo infiammi tam zawk kan la tel ve ngei a beisei tih a sawi.
Olympic Day Run-ah hian infiamna pawl chi hrang 15 chuang atangin mi 631 an inlan a, pawl tlan tam hnenah lawmman hlan a ni. Mizoram Table Tennis Association chu pakhatna niin Rs. 10000 hlan an ni a, pahnihna Mizoram Football Association leh Mizoram Wrestling Association in Rs. 5000 ve ve, pathumna Hockey Mizoram leh Mizoram Amateur Taekwondo Association in Rs. 4000 an la. Lawmman sumfai sem rual hian thing tiak hlan tel nghal zel an ni.
Lammuala hun hman zawh hian Muallungthua Mizoram State Sports Council Ground-ah thing tiak phun a ni.