Aizawlah SARAS Fair nei mek

Aizawlah SARAS Fair nei mek
Mizoram State Rural Livelihood Missions (MzSRLM) buatsaih 10th Regional Sales of Rural Artisans Society Fair (SARAS) Fair 2024 chu Thawhlehni khan Aizawlah neih tan a ni a, Rural Development minister Prof. Lalnilawma’n a hawng.
SARAS Fair hi MzSRLM bultumin kum 2015 atanga neih tan a ni a. Kumtin state capital leh district headquarters-a neih thin tura ruahman a ni. Covid leng leh inthlanpui vanga a khaihlak tum tih lohah chuan tluang taka neih zel a ni. SARAS Fair 2024 hi a vawi 10-na a ni a, December 16 thleng awh tur a ni. Mizoram hmun hrang hranga self help group-ten stall 49-ah an thilsiam an pho chhuak a ni.
MzSRLM hi National Rural Livelihood Mission hnuaiah kum 2013 khan din a ni a. A tum ber chu, thingtlanga cheng chhungkaw harsa zawkte self help group (SHG) hmanga khaichhuah leh retheihna an kalsan hma tanpui a ni. MzSRLM hian Mizoram district 11-a RD Block 28 a tuamchhuak vek tawh a, khaw 706-ah SHG 10425 ding tawhin, SHG hnuaiah hian chhungkaw 81829 an inziaklut tawh. SHG-te khaikhawm tur hian village organisation 791 leh cluster level federation 84 din a ni tawh bawk.
RD minister sawi danin, SHG-te chu bank nena inthlunzawm tum a ni a. Public sector bank nena inthlunzawm SHG 347 a awm tawh a, loan an lak tawh zat chu cheng nuai 568 a ni. Regional rural bank nena inthlunzawm SHG 3871 awmin loan an hmuh tawh zat chu nuai 5930 a ni. Cooperative bank nena inthlunzawm SHG 208 awmin, loan cheng nuai 249 hmuh a ni tawh. Mizoram puma SHG revolving fund hi cheng vaibelchhe 15 vel a ni tih sawiin, community investment fund (CIF), cluster level federation atanga SHG hnena loan pekchhuah hi cheng vbch. 136.16 a ni tih a sawi bawk.
SARAS Fair hawnnaah hian lawmman siam a ni a. Best Berforming Block – Serchhip BMMU, Serchhip RD Block; Outstanding Service Award – Far park Cluster Level Federation, Sangau RD Block; Best Performing CLF – Tuikum CLF, Serchhip RD Block; Community Service Award – Meidum VO, Bilkhawthlir RD Block an ni.