Aizawlah traffic a jam nasa zual

Lirthei a pung a, Aizawl khawpuiah um tluanin traffic a jam tiin a sawi theih ang. A jam zual lai a awm thin a, kum tawp lam hi a jam zual lai a ni thin.
Kuminah pawh November thla chawhma lamah traffic hi a jam zual a, tun hnaiah phei chuan a nasa! November ni 13 khan a jam nasa a, ni 14-ah a hma aiin a nasa.
Traffic Police te chuan traffic jam nasat hun a intan tawhah an ngai a, mahse kum hmasa aiin a intan hma deuh ni chuan an hria.
Ni 14-ah bik chuan Aizawlah puipun a awm thu, Dampa bial by-election vote chhiar ni-ah pungkhawm let let an awm thu an sawi a, tun hnaiah PWD kawng siamna hmanrua, kawng sir vela dah a nih thu leh hei hian kawng a tihchep thu te, Lammualah Children’s Day hman a nih thu te, Zodin velah lirthei a tawt avangin hmun dang pawh a nghawng thu te an sawi.
Tun hnaiah Traffic Police an indaih lo a, khawlaia duty pawh a hma aiin an tlem. Traffic Police engemaw zat chu Bihar inthlanah duty-in an kal a, Aizawla duty an indaih lo tih thu dawn a ni.
Traffic Police hi a zatve thuak Bihar-ah an kal a, khawlaia duty traffic police pakhat chuan, “Kan indaih lo a, ni danga kan duty thinna hmuna awm tur kan awm loh chang a awm a, a kar laka ding tur phei chu kan awm lo a ni ber a. A kar laka lo ding te hian lirthei hi an lo hui a, tawlh tur te, back tur te, ding rih tur tein an lo hrilh a, hei hi a tangkai em em a. Tunah chuan kan indaih rih lo a ni. Kan indaih leh thuai ang,” tiin a thlir dan a sawi.
Sorkar office leh sikul kal hun leh ban hunah traffic hi a jam zual a, hei hi chu kum tluana thil nihphung a ni. Mahse hei pawh hi tun hnaiah a zual niin a lang.
Traffic Police te chuan khawi’maw laiah rei lo te pawh jam se, hmun dang a nghawng thuai a, chu chuan rei deuh deuh a awh chang a awm an ti a, office leh sikul kai hun vela jam pawh hian a hnu thlengin a nghawng thei an ti.