Aizawlah Union HM lokal dawn
Union Home minister Amit Shah chuan vawiin – April 1 hian Mizoram a rawn tlawh dawn a. Infrastructure project leh Assam Rifles awmna tur Zokhawsang hmun chu inbiakhmuh theihna kaltlangin a hawng dawn.
Zirtawpni khan chief minister Zoramthanga hoin programme hman tura inbuatsaihna thlirin a kaihhnawih sawrkar hotute an thukhawm a. Inbuatsaihna hrang hrangte report niin, khawchin awm dan azira programme thlak tum dan ruahmante ngaihthlak a ni.
Ruahman lawk ang chuan, Union Home minister hi chawhnu dar 1.00 ah Lengpui Airport a thleng anga, dar 1.30 – 2.30 ah Aizawl Lammual atangin Assam Rifles Batallion Headquarters Complex Zokhawsang lungphum bakah infrastructure project 9 a hawng anga, tlai dar 4.20 ah Mizoram a chhuahsan leh ang.
Aizawl bawrhsap chuan dan leh thupek kengkawhtuten thupek an chhuahte tha taka zawm turin mipui a ngen a. Bazarpui ni a nih avangin bazar kalte pawhin Union Home minister carcade a kaltlang laiin a theih danin lo lawm turin mipui a sawm a. Carcade-in a rawn tlan tlang chhung hian bazar leh a chhehvelah thuneituten kawng an khar a nih pawhin hrethiam turin mipui a ngen a; kawngkama in sa laite pawhin an in sakna bungrua senghawi tur leh lo chawlsan turin a ngen.
Aizawl Lammual, Raj Bhavan bakah VVIP kalna tur kawng, Thuampui Helipad leh Raj Bhavan inkarah remote control hmang drone leh aerial camera leh hetiang lam chi reng reng bawrhsap hian thlawhtir khap a ni tih a puang a. He thupek bawhchhia an awm a nih chuan an drone leh aerial camera man emaw kahthlak sak emaw a ni anga, an chungah dan angin hremna lek a ni ang tih a sawi. Hei hian police thuneitute leh venhimna lam thawktute a huam loang.
Ruah sur palh thei a nih avangin rokhawlhna avanga Aizawl Lammual a hman theih loh chuan Vanapa Hall ruahman a ni.
Aizawlah Union HM lokal dawn
Get real time updates directly on you device, subscribe now.
Next Post