Aizawlah Unity Run & Cycling

Mizoram Art & Culture department chuan sawrkar laipui Ministry of Culture atanga thu a dawn angin Inrinni zing khan Aizawlah ‘Ekta Diwas Unity Run & Cycling’ an buatsaih a. Central ministry-in state leh union territory zawng zawngte Sardar Vallabhai Patel (Union Home minister hmasa ber leh ‘Iron Man of India’ tia hming an vuah) pian champha kum 150-na hriatrengna atan 2024 October 31 leh 2026 October 31 inkara hun hman dan tur a duan anga kalpui a ni.
Ekta Diwas thupui “One India, Self-Reliant India” tih hmangin Art & Culture department hian Mizoram Cycling Association leh Aizawl City Run Club thawhpuiin Unity Run & Cycling hi neih a ni a. Mi 140 vel tlanin, cyclists 55 an tel bawk.
Art & Culture deputy secretary Lalengvari’n he hun hman chhan a sawifiah a. Vanapa Hall kawt atangin tlan turte a vailiam. Run & Cycling-a telte hi an tlanna kawng an zawh hnuah Vanapa Hall kawtah kir lehin kharna hun hman a ni. Mizoram IGP Seju P Kuruvilla leh Art & Culture joint secretary TC Lalkhuma te pawhin an hmanpui.