Aizawlah World Milk Day hmang

College of Veterinary Sciences & Animal Husbandry, Central Agricultural University, Selesih Aizawl chuan Inrinni khan World Milk Day 2024 an hmang.
June 1 kha World Milk Day a ni a, khawvel hmun hrang hrangah hman a ni. CVS&AH CAU Selesih hian Synod Rescue Centre Durtlang leh Hermon Children’s Home, Durtlangah he ni pual hian hun an hmang a. Synod Rescue Centre-ah hian an college dean Dr Lalnuntluangi Hmar chuan hmanpuiin, college zirtirtu ho leh post graduate zirlai an tel a ni. Synod Rescue Centre-a awm mek mi 67 leh Centre-a thawktu mi 29 te nen World Milk Day hi an hmang.
Durltangah vek Hermon Children’s Home-a naupang 46 leh Home thawktu mi 14 te nen he ni hi an hmang bawk a. Heng hmun pahnihah hian CVS&AH CAU Selesih dean Dr Lalnuntluangi Hmar chuan lawmna thu leh fuihna thu a sawi a. Assistant professor Dr Lallawmzuali Ralte in bawnghnute thatna leh hriselna sawiin, hriat tur tul an inhrilh a, zawhna awmte an chhang nghal a ni.
World Milk Day hi kum 2001 atang khan Food and Agricultural Organisation (FAO) bultumin June 1-ah khawvel huapa hman tan a ni a. A tum bulpui ber chu, bawnghnutea kan lo hnianghnar a, ei tur leh in tur hrisel kan lo uar a, kan inzirtir zel hi a ni.
College of Veterinary Sciences & Animal Husbandry Selesih chuan he ni pual hian kumtin school hrang hrang, Motherless Babies Home leh Special Blind School-ah te kalin hun an lo hmang tawh thin a ni.