Al-Aqsa mosque-ah Israeli minister a tawngtai, Palestinian-ten an dem

Israeli National Security Minister Itamar Ben-Gvir-a chuan ⁠an luah chin, East Jerusalem-a Old ⁠City-a Al-Aqsa Mosque compound-ah a lut a, hei hi kumin chhunga Islam hmun thianghlim ber pathumnaa a luh vawi thumna a tawh a, a chet dan hi Pelestinian tam takin an dem hle.
Sipaite venhimna nasa tak hnuaia Israel-a chengten an zui a, Ben-Gvir-a hian Juda tawngtaina hun a hmang a, kum 1967 atanga status quo kalpui meka he hmunah hian Judate luh phalsak ni mah se Muslim ni lote tawngtai phal a ni lo thung.
Jordanian foreign ministry chuan thuchhuah siamin Ben-Gvir-a’n a tlawh chu status quo inremna bawhchhiatna niin a sawi a, ‘a thianghlimna tihbawlhhlawh, hnial rual lohva leh ⁠a pawm theih loh inepna boruak siamna’ a nih thu a sawi.
Palestinian Authority-a president pawhin tun hnaia mosque compound beih a nih chu a dem hle bawk.
Thuchhuah siamin he thil hi hmun thianghlima a nihna leh dang anga kalpui status quo bawhchhiatna chiang tak a nih thu a sawi niin Palestinian news agency Wafa chuan a tar lang.
Kum 2022-a thuneihna minister a nih hnuah Ben-Gvir-a hian mosque compound hi vawi 16 vel a lut tawh a. Juda hnam nihna chawi vawng tak minister hi Al-Aqsa Mosque luah duhtu Muslim hmun thianghlim aiah Juda synagogue sak duhtu a ni.
“Vawiin hian hetah hian neitu ang maiin ka inhria,” tiin a pisain a tlawh lai video a thehdarhah Ben-Gvir-a hian a sawi a. “Tih tur tam tak a la awm a, tihchangtlun tur tam zawk a la awm. Prime Minister (Benjamin Netanyahu) hi ka nawr chhunzawm zel a ni,” a ti bawk.
Netanyahu-a pisa chuan engmah sawi an la nei lo.
Israel hian February 28-a Iran laka indona a kalpui hnuah ni 40 chhung chu Al-Aqsa Mosque hi mipui tan a khar tawh a. A hma pawhin khapna a siam fo va, a bikin Palestinian inkhawmte lakah khapna hi a siam fo thin a. Kumin hian Al-Aqsa-ah Eid al-Fitr tawngtai a lo khap tawh a, hei hi kum 1967-a Israel-in dan lova East Jerusalem a luah hnua hetiang a tihna hmasa ber a ni.
Mosque hi Ningani khan Palestinian inkhawm duhte tan hawn leh a ni a; mahse, hemi ni tlaiah Israeli-ten an luhchilh a, pathian biakna chi khat, Talmudic an ti a, Israeli police-ten an veng niin Wafa chuan a tar lang.
Wafa chuan Israel thuneitute hian Israeli chengten ni tin an luh theih hun chhung chu minute 30 an tihbelh niin a tar lang bawk.
Hetihlai hian Israel hian an ram luah mek, West Bank-ah beihpui an thlak chhunzawm zel a, Pathianni khan mi 18 chuang man an ni.
Wafa chuan Israel-in Bethlehem chhim lam, Dheisheh refugee camp an beihnaah Palestinian paruk a man tih a tar lang.
Nablus khawpuia beihpui thlaknaah Israeli sipaiten naupang pakhat leh tlangval pakhat an hliam bawk.
Israeli sipaite hian Gaza leh West Bank-ah beihpui an thlak chhunzawm zel a, Iran leh Lebanon pawh an beih chhunzawm zel bawk.
United Nations Office for the Coordination of Humanitarian Affairs (OCHA) chuan October, 2023 atang khan Israeli-te hian Palestinian mi 1,100 chuang West Bank-ah hian an that tawh tih a sawi a, mi sang tam tak chu baihvaiin an siam bawk.