Alaska thlawhna tlaah a chuang mi 10 thi vek

Alaska-a thlawhna chesuala thi mi 10-te ruang lak chhuah leh zawn hna an la thawk mek zel tih thuneituten an sawi.
National Transportation Safety Board chair Jennifer Homendy chuan an chhuina chu a la bul hle a, tunah rih chuan an chetsual chhan hi ‘sawi nan a la hma’ tih a sawi.
Cessna Grand Caravan aircraft hi Bering Air-in an kalna niin Thawhlehni khan Unalakleet atanga Nome a pan laiin biakpawh theih loh a ni.
Passenger pakua leh a khalhtu chuangin Alaska khawthlang lam vaukama mihring 3,500 vel chenna, Nome chhimchhak lam km 55 vela hla, Norton Sound-ah a tla tih hriat chhuah a ni.
Thite zingah hian Alaska Native Tribal Health Consortium-a thawk, Rhone Baumgartner leh Kameron Hartvigson te pawh an tel a. Unalakleet pana kal niin water plant chhia siam tura kal an ni tih an thawhna chuan a sawi.
Homendy-i chuan a hmunah chhuitu mi pakua an awm a, Washington DC-a specialist-ten an pui bawk tih a sawi.
“Ruang hmuh tuma beih mek a ni a, chu chu kan ngaih pawimawh ber a ni,” tiin Alaska-a khawpui lian ber, Anchorage-a thuthar lakhawmtute a kawmnaah a sawi.
Homendy-i hian khaw awm danin a zir loh avangin hna thawh chak a har tih a sawi a, thlawhna pawh hi ni khata mel nga chauha chaka kal theihna vvur khawnah a tla tih a sawi.
Alaska State Troopers chuan thlawhna tlak thu hi Ningani tlai dar 04:00 (India-a tlai dar 06:30)-ah an hria tih an sawi a. Nome volunteer fire department chuan pilot-in air traffic controller-te hnenah ‘tumna tur tlankawng nghah nan an thlawk kual rih’ tih a hrilh niin an sawi bawk.
US Coast Guard chuan a hnu lawkah thlawhna hi a thlawh san zawng leh chak zawng inthlak thutin biakpawh theih loh a ni zui tih an sawi a. Thlalak darhah Hetih lai hian vel khaw hmuh theih chin a tawi hle tih a lang bawk.
Unakleet leh Nome hi mek 150 vela inhlat niin Norton Sound thlawh kân ngai a ni a, Alaska khawthlang vaukama Bering Sea atanga khawmual inkhawh lut a ni.