Alcaraz hmaa ding turin ‘lucky’ Djokovic tlang hram!

Alcaraz hmaa ding turin
‘lucky’ Djokovic tlang hram!
6-3 7-5 3-6 6-4-a tualchhung innghahna awmchhun ni tawh American Taylor Fritz a hneh hnuah Novak Djokovic chuan US Open men’s singles draw semi-final pakhat zawkah a record ropui siamna dal theitu lian ni thei tura ngaih Carlos Alcaraz a hmachhawn dawn!
Fourth seed Fritz hian na takin Djokovic-a serve kha a dolet ve ngar ngar a, Serb tan pawh a khirh ve fat fat hle a, break point a paltlang sek a ngaih phah a, inkhelh banah pawh a hnehna sualchhuah kawngah vanneihnain a puih fo thu a zep lo!
Djokovic hian inhnehtawk tak inkhel a nih thu sawi chungin second leh third set khelh chhung hun tam zawkah phei kha chuan a tumpuipa kha player tha zawk a nih thu a sawi.
Kum 38 mi ni tawh Djokovic hian Arthur Ashe Stadium-a a paltlang leh hram Fritz kha tunhma lama vawi 10 a lo hmachhawn tawhah a la hneh fai vek a, mahse, tuntum chu nikum runner-up kha a tang na thei ta hle a, tualchhung tlangval nih manah tantu a ngah bawk a, mahse, a chawlh hma ngeia major title 25 lak tlin tuma theihtawp leh tlem chhuah kal mek Serbia superstar thi thaa tang meuh chu a la lehthal zo leh ta rih lo a ni!
Djokovic hian final ai pawha hautak mah zawk tura ngaih second seed Carlos Alcaraz hmachhawn tur a la nei zui tlat mai a, tennis player piang chhuak tawh zawng zawng zinga Grand Slam singles title 25 la tling thei awmchhun nih a tumna kawng hi a derthawng ru leh riau tawh!
Spaniard Alcaraz kha Djokovic aia kum 16 laia naupang niin, tha za rual, vanglai thleng chho tan mek a ni a, chuai lam pan tawh Djokovic-a record dangbet tluanchhuaktute zingah a tel lo ang tih sawi theih a ni lo!
Thawhlehni quarter-final inkhel dangah Alcaraz hian 6-4 6-2 6-4-in Czech Jiri Lehecka a hneh awlsam leh et a; 24-times major winner Novak Djokovic lakah pawh hian rinkai zawk a ni mah ang chu!
Men’s singles quarter-final dangah nimin khan eighth seed Alex de Minaur leh Canada mi Felix Auger-Aliassime intumin, world number one Jannik Sinner leh a chipui Italian Lorenzo Musetti inkhel result pawh tarlan hman a ni ta lo.
Djokovic-a elpui kumhlun pahnih Roger Federer leh Rafael Nadal-te an kalbo tawh a, Serb pawh hian a tum ber record thar hi sualchhuak se tennis inelna a chawlhsan ve tawh mai a rinawm a; hnahthar lo chhuak zingah Alcaraz leh Sinner-te hi major title 24 la tling ve tawh Australian nu ropui Margaret Court-i nena an record intawm atanga penkhata hmasawn a tumna dal theitu lian leh dal mektu an ni!
Kumin chhung ringawta match 59 tehreng chak tling leh tawh Carlos Alcaraz hian Wimbledon final-a tum hnih ngawt Serb hnehin Djokovic-a record ropui ni kumkhua tur hi vawi hnih lai a lo dangbet tawh a; chutih laiin an intum hnuhnung vawi hnihah Djokovic hi a chak zawk ve ve a, pakhat chu nikum summer Olympic final kha a ni.
Kum 22 mi lek Alcaraz hian a career la rei lo takah Grand Slam title panga hawn tling der tawhin, tuntum hi set hloh loa major tournament last four a thlen vawi khatna a ni a, 2008 French Open-a ropui Rafael Nadal hnu lama mipate zinga chuti ang ti leh thei naupang ber a ni nghal.