Hliam bawhbuai Mizoram tlawm!
75th Junior National Basketball Championship, Guru Nannak Indoor Stadium Ludhiana (Punjab) a September ni 2 atanga ni 9 thleng neih turah Mizoramin chakin bul tan mah se, an match hnihna ah player pawimawh pahnih inhliam avanga chhawr thei lo Mizoram chuan 50 – 57 in Gujarat an hneh lo.
Mizoram khel hi dan pangaiin a hmuhnawm lehpek hle a, an khel a rangin an ball thiamna an chhawr lehnghal pang; mahse, 3 pts an luh theih loh leh rebounds-ah an ngam loh hret a lang a, Gujarat player sang filawr pahnih an khel tha thlawt a, an chak chhanah a ngaih theih hial!
Heng karah hian Mizoram team hian palian tan chauh basketball hi a nih bik loh zia lantirin, a thiam zawk leh khel hmuhnawm zawk an chak theih reng bik loh zia erawh a dik tih an nemnghet thung lawi si!
Inkhel live a pekchhuahna, Sports Cast India Youtube channel-ah tihchhuah a ni. inkhelhna hmun, Guru Nannak Indoor Stadium erawh ruahsurin a tihbuai deuh avangin tan hun tura duanah inkhel tan theih a ni lo. Mizoram hian vawiin ah match hnih an khel dawn a, hliamin a tihbuai avangin ni khata match hnih khelh hi Mizoram tan a khirh ang tih a chiang.
Gujarat vs Mizoram
1st quarter
16 – 11
2nd quarter
32 – 20
3rd quarter
44 – 34
4th quarter
57 – 50
Point nei hnem zual (Mizoram)
1. Lalrinchhana – 15 pts.
2. Roney Vanlalawmpuia – 11 pts.
3. Emanuel Lalepkhlua – 8 pts.
Inkhel leh hun tur
September ni 4, 2025
Mizoram vs Goa – 8:15 am
Odisha vs Mizoram – 7:30 pm