Alcaraz hmachhawn tur Rune

Tennis a inelna lian Grand Slam pali zinga ngaihhlut hlawh ber Wimbledon khelh mekah last 16 khelh zawh a ni a, Thawhleh zan atang khan quarter-final khelh tan a ni. Thawhtan zana last 16-ah World No. 1 Carlos Alcaraz chuan harsatna lian tawk lova Matteo Berrettini hnehin quarter-final a lut a. Rawlthar ngaihven hlawh Holger Rune pawhin quarter-final a lut ve bawk a. Quarter-final-ah rawlthar ngaihven hlawh pahnih; Alcaraz leh Rune an inhmachhawn zui dawn.
World No. 1 Carlos Alcaraz hian last 16-ah kum 2021 finalist Matteo Berrettini a hmachhawn vangin fiahna harsa leh hautak a hmachhawn a. A khingpui Berrettini hi Grass-a khel tha thin a nih vangin Alcaraz tan hneh harsa tura ngaih a ni. Khingpui hautak, a kawng dal thei tura rinkai zinga mi Berrettini lakah bul tan tha lo mah se Alcaraz hian No. 1 nih phu a nihzia Court chhungah a langtir a, phu takin hnehna an a chang zui.
Final lut a, Djokovic kawng dal thei tura ngaih zinga tel Matteo Berrettini hian rawlthar duhawm Alcaraz lakah tha zetin bul a tan. Set khatnaah break a neih a chhawr tangkai a, game thum chauh hloh chungin set khatna a la. Set la hmasa zawka a tan bakah an khel dan enin Berrettini hi a chak zui theih rinna lian tak a awm hman. Berrettini rinkai zawk a nih hman laiin Spaniar Alcaraz chu huaisen takin a inlan a, a khingpui Berrettini hi thochhuak tur awm lek lovin a chungtlak zui.
Set hnihnaah Alcaraz hian tha takin bul a tan a, break a nei thuai. A khelh that chhoh em vangin a khingpui Berrettini a talbuai a, Italian hian a tisual zawn tluk tluk a ni ber tawh. Tihsual ngah tak Berrettini hian point hmu miah lovin a serve a hloh zi ta hial. Break a neih chhawr tangkaiin Alcaraz chuan set a la let.
Set a lak hnuin Alcaraz a khel tha chhunzawm a, Berrettini a buai zual telh telh thung. 2021 finalist hian kawng hrang hrangah a khingpui a ngam lo zual deuh deuh a, tihsual a ngah zui zel. Set thumna leh set linaah Alacaraz hian break vawi khat ve ve neiin game bak a hloh lo ve ve bawk a. Khingpui hautak tura ngaih Berrettini lakah 3-6, 6-3, 6-3, 6-3 a hnehna changin quarter-final a lut. Alacaraz hian quarter-final-ah a rualpui Rune a hmachhawn zui leh ang.
Thawhtan zana last inkhel dangah Denmark rawlthar Holger Rune chuan tawnhriat ngah Grigor Dimitrov a hmachhawn a. Inkhel hmuhnawm takah set a hloh hmasak zet hnuin hnehna a chang let a, inelna ngaihhlut hlawh tak Wimbledon-ah quarter-final a lut.
Kum 20 mi lek ni a, khawvela player tha ber zinga tel phak tawh Rune hian tawnhriat nghah Grigor Dimitrov lakah bul a tan tha lova, a serve a hum zawh loh tuarin set khatnaah game thum bak a la thei lo. Set khatnaah che tha lo mah se a insiamtha thuai a, boruak sangah a talbuai zui lo. Set hnihnaah an inhneh-tawk viau a, game an inlak chhawk zak zak hnuin tie-break-ah Rune a chak hram a, set a la let.
Set thumnaah pawh an inhnehtawk zui leh viau a, tie-break hmangin thelh an ngai zui leh. Tie-break-ah hian thahrui ngah zawk Rune a chungnung zui leh a, set a la nawn leh. Set lak tuma an inbeih chiam vangin kum upa zawk Dimitrov chu chau zawkah a tang a, zet linaah a zuai tawh. Set linaah hian break a neih chhawr tangkaiin Rune-a’n set la zui leh a. Inkhel hmuhnawm takah 3-6 7-6 (8-6) 7-6 (7-4) 6-3 in a chak a, quarter-final a lut ta a ni.
Quarter-final-a inhmachhawn tur Carlos Alacaraz leh Holger Rune te hi kum 20 mi ve ve an ni a. Chhuan thara Tennis star ropui pahnih ni tura ngaih, hmabak eng tak nei an ni. Nadal leh Federer vul dun ang maia vul dun thei tura ngaih an ni a. An lakah Tennis chik tuten beiseina an nei sang hle. An ni pahnih hi vawi hnih an inkhel tawh a, vawi khat ve ve an chak tawh a, an la inhnehtawk mek. Zanin dar 7:15 hian a vawi thum nan an inhmachhawn dawn a. A chak zawk zawk hian champion zui theihna hun tha an nei dawn. Alcaraz leh Rune te inkhel tur hi Tennis ngainatute tan en hmaih thiang lo tluk a ni.
Thawhtan zan hian Novak Djokovic leh Hubert Hurkacz ten an khelh hmabak an khel zo a. Set hnih la zawn tawh Djokovic-a’n set a hloh hmasak zet hnuin set linaa a la a, hnehna changin quarter-final a lut zui ta a ni.