Alcaraz inkhel entu khuai rual!

Ningani Indian Wells men’s singles quarter-final match pakhatah kumin Australian Open quarter-final match-a lo intum tawh world number two Carlos Alcaraz leh Alexander Zverev inhmachhawn laiin khelmual chung leh a chhehvelah khuai rau an chawl a, chu’ng khuaite chuan khelmuala an video camera kam (high-wire camera) an bawm a, inkhel a khaihlak phah zeuh nghe nghe.
Chair of umpire Mohamed Lahyani chuan, “Ladies and gentlemen, khuaiin min beih (bee invasion) avangin inkhel tihtawp lailawk a ni,” tiin a puang a, player pahnih pawhin khelmual chhuahsanin an thutna lam an pan phah!
Rei chawl loin an khelh chhunzawm a, Spaniard Alcaraz chuan Melbourne Park-a a chak loh phupa lain German lakah 6-3, 6-1 hnehna changin semi-final a lut a, zaninah Australian Open champion Jannik Sinner nen semi-final match an khel zui leh ang.
Kum 22 mi Italian third seed Sinner hian kumin January thla khan Australian Open final-ah Russian Daniil Medvedev hnehin a vawikhatna atan Grand Slam title a hlawhchhuak a, Indian Wells semi-final a luhna kawnga 6-3 6-3-a world number 32 Czech Jiri Lehecka a hneh kha a zawna match 19 a chak tlinna chiah a ni nghe nghe.
World number three Sinner tlawm hnuhnunber chu nikum season kharna ATP Tour Finals hmawrbawkna match-a Novak Djokovic a hneh loh daih tawh kha niin, duhthusama thain 2024 season a tan chho kal mek a, a chak zawnna kal mek hrulah hian January thla Australia rama Grand Slam title a paltluk bakah thla hmasa maia Rotterdam khaw trophy a sualchhuah kha a tel bawk.
Mipa singles inkhel dangah American 17th seed Tommy Paul chuan Norwegian ninth seed Casper Ruud lakah 6-2 1-6 6-3 hnehna changin a vawikhatna’n California tournament last four a lut a, Danish seventh seed Holger Rune hnehtu Russian world number four Daniil Medvedev nen vawiin hian final luh an inchuh ve bawk ang.