Tennis inelna lian Grand Slam pali zinga ngaihhlut hlawh ber Wimbledon chu July ni 1, Thawhtan tlai khan khelh tan a ni a, mipa lama champion Carlos Alcaraz chuan awlsam takin hnehna a chang nghal. Inkhel dangah World No. 1 Jannik Sinner chuan set khat hloh chungin YannickHanfmann a hneh ve bawk.
Mipa lama champion lai Carlos Alcaraz hian Centre Court-ah Estonian qualifier Mark Lajal a hmachhawn a, set hloh lovin chak bawk mah se awlsam taka chak erawh a ni bik lo. French Open champion thar Alcaraz hi a khingpui Lajal nen set khatnaah an inhnehtawk viau a, tie-break khelh a ngai nghal pang. Tie-break ah tawnhriat ngah zawk Alcaraz a chungnung a, set la hmasa zawkah a tang.
Set khatna a lak hnuin Alcaraz a khel tha chhunzawm a, set hnihnaah break pawimawh tak a neih a chhawr tangkai a, game nga hloh chungin set a la zui leh. Set hnih a hloh zawn hnuin Lajal a fei zo tawh lova, set thumnaah game thum bak a la thei lo. A trophy kawl mek humhim tuma tan khawh Alcaraz hian 7-6 (7-3) 7-5 6-2 a hnehna changin second round a lut.
Champion lai Alcaraz a chak rual hian World No, 1 thar Jannik Sinner pawhin hnehna changin, second round a lut ve bawk. Sinner hian Yannick Hanfmann a hmachhawn a, harsa taka set hnih a lak zawn hnuin set thumnaa a hloh a. Set khat a hloh hnuin tha zual zawkin a kir a, awlsam taka set la zui lehin a khingpui Hanfmann hi
6-3, 6-4, 4-6, 6-3 in a hneha second round a lut.
Mipa lama player langsar pahnih an chak laiin champion hlui Andy Murray erawh chu mimal inelna atangin a inhnukdawk a, doubles inelna a hmachhawn dawn thung. Kumin kum tawpa Tennis chawlhsan tum Murray hi Tomas Machac hmachhawn tur a nih laiin mimal inelna hmachhawn a zuam leh lo a ni.
Alcaraz leh Sinner te an chak nghal
Get real time updates directly on you device, subscribe now.
Prev Post