Taylor Swift thawmhnaw Victoria & Albert Museum-ah phochhuak dawn

Taylor Swift thawmhnaw leh a mimal thil thenkhat chu Victoria and Albert Museum, London-ah tun nipui chhung hian an phochhuak dawn a, museum-a a thawmhnaw leh mimal thil phochhuah tur hi Swift hian museum-ah hian a hawh tir dawn a ni.
Taylor Swift hian a rimawi zinkawnga a thawmhnaw hak thin leh a mimal thil thenkhat a hawh tir tur zingah hian concert-naa a hak thin thawmhnaw leh a boot bun thin te, storyboard te pawh a tel a, a display hmingah hian Taylor Swift: Songbook Trail tih a ni ang.
He museum-a senior curator Kate Bailey chuan, “Taylor Swift- thawmhnaw hlui chi hrang hrang VA-ah tun nipui chhunga kan phochhuak thei tur hi kan phur takzet a, a rimawi zinkawnga thil pawimawh tak tak te a ni ang,” a ti a, Swift mimal thil museum-a an phochhuah tur hian an museum tlawhtu mipui tam tak a hip ngeia a rin thu a sawi bawk.
Tun tuma an phochhuah tur thil thenkhat hi chu mipui hmuh tura vawi khat phochhuahna tur te a ni a, South Kensington-a museum hian July ni 27 atanga September ni 8 thleng free exihibition hi an kalpui dawn a ni.
Taylor Swift hian The Eras Tour nei mekin, UK-ah hun a hmang zo chiah a, UK-ah hian Edinburgh, Liverpool, Cardiff leh London-ah te show neiin, August thlaah Wembley Stadium-ah hian show vawi nga a nei leh dawn a ni.
Te Eras Tour sawi takah chuan Swift hian Ireland tlawhin, Aviva Stadium, Dublin-a show a neihnaah stage-a a dinna platform chu a tawlh hniam ve thei ta lo a, ‘The Smallest Man Who Ever Lived’ tih hla a sak lai a ni a, a dancer zinga pakhat, Jan Ravnik, platform danga ding chu a dinna a tawlhhniam fel tawh a. Ani chuan Swift talbuai deuh chu hmuin a va pawm thla ta a, Swift hian buai chuang miah lovin a choreography a chhunzawm ve leh ta mai a ni.