Algeria president tling nawn ti

Algerian thuneiture chuan President Abdulmadjid Tebboune chu inthlanpui neihah thlan tlin a nih leh thu puangin mahse a tumpui ber candidate chuan inthlan vote chhiarah thil fel lo tam tak a awm tiin registered voters zahve pawh tling lovin vote an thlak chauh tiin a sawi.
Official preliminary result tihchhuahah Tebboune chuan 95% vote hmuin second round run-off pawh a ngaih loh phah a, amah hnaih bertu Abdelaali Hassani Cherif chuan 3% vote hmu in Youcef Aouchiche chuan 2% vote a hmu thung a, vote tla 48% tia sawi a ni.
Tebboune hi military te thlawp niin Hassani Cherif chu a tumpui ber a ni a, Cherif hi moderate Islamist niin Aouchiche erawh moderate secularist a ni thung a ni.
Hassani Cherif’s campaign team te chuan polling station officials te chu result khawih danglam tura tih an ni tia sawiin vote tla zat pawh candidate aiawh te hnenah hrilh thei lovah an puh bawk a, chumai bakah proxy group voting pawh a awm nasa an ti bawk.
Mahse electoral commission Mohammed Charfi kaihhruai chuan inthlan result a puannaah inthlan chu felfai leh thianghlim taka tih a ni tiin a sawi ve thung.
Tebboune thlan tlin leh a nih takah chuan Algeria chuan sorkar programme hmanga social spending nasa takin a kalpui leh ngei dawna ngaih a ni a. Hei mai bakah hian unemployment benefits, pension tihsan te bakah public housing programme kalpui te a tiam bawk.
Tebbouni hi kum 20 chhung zet thuneihna chang Abdulaziz Bouteflika sorkar laka lungawilohna mass ‘hirak’ (movement) hmangin thlan tlin a lo ni tawh a, Tebbouni chu security forces tena an thlawp a ni bawk.
Kum 2019-a thlan tlin hmasak a nih khan Algeria-a anti-establishment boruak lenzia a pholang tih a ni a, voter turnout chu 40% chauh a ni a. Vote tla tlem lutuk chu mipui tena politician-te an rin lohzia pholanna anga ngaih a ni.
Kum 2022-a Russia in Ukraine a run avang khan Algerian gas leh energy te chu demand a sang hle a, chu chuan revenue thahnem tak neihbelhtir phahin chung atanga sum hmuh tam tak chu tebbouni sorkar chuan economic reforms siam nan an hmang bawk.
Foreign policy lamah chuan Tebbouni record a tha fahran lo thung a. Europe a gas petu pawimawh a ni chungin a hmelma ber pakhat Moroco chu Westen Sahahra sovereignty inhuhnaah Spanish leh French te chu a hmin zawk a, Algiers chuan Polisario seperatist te a thlawp zawk a ni. Hei bakah hian Morocco chuan African leh Arab state pawimawh te a hmin zawk bawk.
Algeria-in BRICS group member nih a tumna pawh hlawhchham puiin BRICS te chuan Egypt, Ethiopia, Iran leh UAE te chu an thlawp zawk bawk a Thla kalta khan Algeria chuan BRICS development bank a zawm ve thei chauh bawk.
Africa-a ram pawimawh tak a ni chungin a ram chhung inrelbawlna fello leh economy lama tlahniam zual zel chuan khawvel huap pawhin ram pawimawhah a dah hleithei lo va. Politics lama buaina in a tlakbuak reng bawk avangin harsatna a tawk reng a ni.