All England Open hnehtu Se Young leh Li Shifeng

Birmingham khuaa khawvel huap
badminton tournament lian
khelh zawh tak Yonex All England Open Badminton Cham-pionships 2023 hmeichhe singles lamah South Korean nula An Se Young a champion a, mipa singles-ah Chinese star Li Shifeng a chak ber ve thung.
Korean hoin kum 27 zet All England Open-a women’s singles title an nghah hnuah Pathianni zan khan an duh an nghakchhuak ta a, kum 1996-a an legend Bang soo-Hyun champion hnua a hmasaber ni turin All England Open final a khelh vawikhatnaah kum 21-a upa An Se Young chuan 21-17, 10-21, 21-19-in Olympic champion lai Chen Yufei a hneh a, kumin chhung ngawta final vawinga khel tawha vawithum champion tling tawh Chinese Yufei a fei zo tlat lo!
Seeded No. 2 ni chunga inlan Se Young hian Inrinni semi-final lamah World No. 1 hlui Tai Tzu Ying nen marathon match khelin, darkar khat leh minute 22 zet chhungin 17-21, 21-19, 24-22 hnehna a chang hram a; young Korean shuttler hi chau thawkhat mah se final-ah ngai a rawn awh leh hman a, nikum final ang lo takin 2019 champion Chen Yufei lakah hnehna hlu bik a sualchhuak.
Se Young hian Pathianni zan final khelh hmaa vawi 10 an intum tawha vawihnih chiah a la hneh Chinese nu rothap lakah a career-a title lian ber a hlapchhuak ta a ni.
Kumin hi An Se Young tan kum tha ni ve reng rengin, January thla mai khan India Open Super 750 leh Indonesia Masters Super 500 tournament-ah a champion tawh a; kumin chhunga tournament a khelh tawhah final la lut kim vekin, title ngaihhlut hlawh All England Open lallukhum hial a hlawhchhuak ta a ni.
Kum 2006 daih tawh khan South Korea ramah khian All Egland Open men’s singles title luh theihna kawng a inhawng a, mahse, Lee Hyun-ll chuan final-a a tumpui legendary Lin Dan a hneh zo lo a; tunah Korea mipuiin hmeichhe singles title lawm tur an nei ta.
Pathianni khan Birmingham khuaah Korean fans lamin lawm tur dang nei bawkin, Kim So Yeong leh Kong Hee Yong tangdun chuan final-ah Korean pair ve tho hnehin wo-men’s doubles title an hlawhchhuak a; an pahnih thawkduna Super 1000 title an lak vawihnihna leh belh-khawma women’s doubles title pariat an lak dunna chiah a ni bawk.
World Championship silver medalists pair hian minute 43 lek chhungin final-a an khingpui Baek Na Ha leh Lee So Hee inkawp chu 21-5, 21-12-in an hneh.
A hma kar chiah khan Baek leh Lee tangdun hi German Open-ah an champion a, Birmingham-ah erawh an chipuite an ngam ta lo.
Mipa champion ve thung
Tarlan tawh angin, Pathianni All England Open 2023 mipa singles final-ah Chinese shuttler ve ve intumin, All England debutant Li Shifeng chuan rin loh takin Shi Yuqi lakah 26-24, 21-5 hnehna a chang a, a career-a a hmasaber ni turin BWF Tour Super 1000 title a hlawhchhuak ve ta nge nge.
Utilita Arena Birmingham-a 2023 All England Open-ah hian lawmmanah US dollar 1,250,000 semral niin, mipa leh hmeichhe singles champion ve vein hlawh inang US dollar 87,500 an dawng a; final-a chak lo zawk kutah USD 42,500 lutin, semi-final paltlang zo loin USD 17,500 an hlawh a; quarter-finalist chinin USD 6,875 hum hawin, last 16 thleng tan USD 3,750 dah a ni a; last 32 lut chinin USD 1,250 an dawng ve bawk.
Doubles champion kutah US dollar 92,500 lutin, runner up tan USD 43,750 dah a ni a; semi-final paltlang zo loin USD 17,500 dawngin, quarter-finalist chinin USD 7,812.5 an la a, last 16-a tlain USD 4,062.5 huiin, last 32 paltlang zo lo kutah USD 1,250 a lut ve bawk.