England squad atangin pathum inhnukdawk
Tun thla tawp lama Euro 2024 qualifiers khel tur England squad puan tawh atangin player pathum – Manchester United striker Marcus Rashford, Chelsea midfielder Mason Mount leh Newcastle keeper Nick Pope an inhnukdawk.
Rashford hian Pathianni zan FA Cup quarter-final match-a Fulham an hneh tum khan hliam tuarin, ram tana game 10 khel tling ve tawh Pope hi karliamta Zirtawpnia Newcastle United-in 2-1-a mualneitu Nottingham Forest an hneh tum khan a intina.
Mount hi hliam la thawhsan fel lo chunga beiseina nena sengluh kha ni mah se a dinhmun enin squad-a tel zui chi niin a lang lo a, Chelsea lamah ngaiawh chho turin a bei zui zel ang.
Tarlan tak angin, England manager Gareth Southgate chuan player 25 awmna squad enchhin hmasakah Mount hi telhin, a hnu lawkah Chelsea boss Graham Potter chuan a player damchiang lo kum 24 mi tan international team zawm chi a nih rih loh thu a sawi a; kap bawr ruh tihnat vanga kumin February thla atanga Blues tana la inlan leh ta lo vang vang Mount hian Inrinni league-a Everton an draw tum pawh khan khelmual a la lut thei lo.
Season kal laia Old Trafford club tana chetha tluang rei tawh zet Rashford hian goal 27 thun tling tawhin, Qatar World Cup zawh hnua goal 19 a thun nen phei chuan Manchester United damna tih hial a phu a; Qatar ram tournament lianah khan Three Lions tan match nga khelhah goal thum a khung tling bawk.
Pope-a hmunruak luah turin Southgate chuan kum 35 mi Tottenham keeper Fraser Forster a ko a; England thuchhuah chuan Thawhtannia St. George’s Park-a inlan tura tih player 23-te bak midang koh zui tumna a awm loh thu an tarlang.
England manager Gareth Southgate hian ram tana la khel ngai lo striker Ivan Toney chu squad-ah telhin, kum 27 mi Brentford player hi Premier League season kal laia English player goal khung hnember dawttu a nih mek laiin thlan zingah a tel a; ram tana kohna a dawn laiin a club vawn lai tan league goal 16 a ngah tling tawh a, Tottenham thiampuipa Harry Kane chiah phak loh a nei. Hetih lai hian Football Association betting rules bawhchhiaa puhna a pawm avangin hremna a tawh ngei rin a ni.
Nikum November thla khan Toney hi dan loa pawisa inchawina 232-a inhnamhnawiha puh niin, December thlaah dan bawhchhiatna case dang 30 awrhtir belh leh a ni a, a chungchang ngaihtuahna (disciplinary hearing) a nghah mek laiin season kal laiah a chetha si a, ram tan koh loh phal a ni lo!
Southgate chuan hrem hmabak a koh chhan sawifiahin, “Club tan a khel tho a, koh theih a ni. A chungchang ngaihtuahna pawh an la kalpui em lo a, thutlukna phei chu siam a la ni lo lehzual a, ka koh loh ngawtna tur chhan ka hre mai lo.
“Ivan hi season kal laiah a chetha mar ngang mai a, a khel tha kal tluang a, game-a a tel lai hmuh hi nuam ka ti,” tiin hremna tawk thei player a fak.
Nikum khan Toney hi Nations League qualifiers lama Italy leh Germany hmachhawn tur England squad-ah koh ni ve bawk mah se khelhtir a ni lo.
Tuntum England squad-a koh a nih laiin he forward hian Premier League season kal lai table-ah Brentford chu pariatna a nihpui a; kumin February thlaa top flight hmahruaitu Arsenal nen sikhat ve ve thuna an inhnehtawk tum pawh khan an siphurh suttu a ni.
Chanchinbu lamin bar-a a chemawi lo lai inphochhuaka an puhna Cheshire Police lamin an chhui mek laiin Manchester City right-back Kyle Walker pawh squad tharah koh a ni ve tho bawk!
Tuntum squad-ah hian Qatar tournament khel player-te zinga panga koh an ni lo thung a, chu’ng zinga pakhat chu Liverpool right-back Trent Alexander-Arnold niin, a dangte chu defender pahnih Conor Coady leh Ben White bakah striker Callum Wilson leh inhliam Raheem Sterling-te an ni.
Hliam avanga nikum World Cup khel thei lo Chelsea right-back Reece James leh left-back Ben Chilwell-te kha quad-ah an kir a, Crystal Palace defender Marc Guehi pawh hmuh tur a awm.
England hian March ni 23, Ningani hian mualneitu Italy an khel ang a, March ni 26 Wembley match-ah Ukraine an mikhual zui leh dawn a ni.
Three Lions match pahnih khelh tur hi nikum December thla World Cup quarter-final match pakhata France an hneh loh hnua England game khelh leh hmasakber turte an ni.
-- Advertisement --
England squad
Goalkeepers: Jordan Pickford (Everton), Fraser Forster (Tottenham Hotspurs), Aaron Ramsdale (Arsenal)
Defenders: Ben Chilwell (Chelsea), Eric Dier (Tottenham Hotspurs), Marc Guehi (Crystal Palace), Reece James (Chelsea), Harry Maguire (Manchester United), Luke Shaw (Manchester United), John Stones (Manchester City), Kieran Trippier (Newcastle United), Kyle Walker (Manchester City)
Midfielders: Jude Bellingham (Borussia Dortmund), Conor Gallagher (Chelsea), Jordan Henderson (Liverpool), James Maddison (Leicester City), Kalvin Phillips (Manchester City), Declan Rice (West Ham)
Forwards: Phil Foden (Manchester City), Jack Grealish (Manchester City), Harry Kane (Tottenham Hotspurs), Bukayo Saka (Arsenal), Ivan Toney (Brentford)