Alzheimer Day pualin kawng zawh

Ningani khan World Alzheimer’s Day pualin Chanmari kawn atanga Millenium Centre thleng Memory Walk neih a ni a. Millenium Centre Courtyard-ah inkhawm neih a ni.
Memory walk hmanpuitu Health & Family Welfare minister Dr R Lalthangliana chuan Alzheimer leh a anpui natna tuarte a tawrhpui thu leh a enkawltuten hrethiam tak leh hmangaih taka enkawl zel turin a fuih.
Alzheimer natna hi Mizoramah pawh ‘thluaksawng natna’ tiin, natna hriat hlawh tak a ni a. A tihdamna a awm lo ti mah se, a veite enkawl danah chhungkua, thenawm khawveng leh khawtlang hriatthiamna, enkawl thiamna leh intawiawm tawnna chu thil tul tak a nih avangin a ngaihventu pawl din a ni a. India ram puma Alzheimer natna leh a anpui natna dang ngaihventu pawl, Alzheimer and Related Disorders Society of India (ARDSI) Mizoram Chapter chu 2015 September 21 – Alzheimer Day ah din a ni.
ARDSI Mizoram Chapter hian phungbawm sawmin Alzheimer natna sawihona leh natna vei enkawltute zirtirna – seminar leh workshop an buatsaih thin a. Aizawl leh a chhehvel hi zone hrang hrangah thenin MUP nen Alzheimer natna veite chhinchhiah leh tlawhchhuah hna an thawk a, an thihin an ral bawk. Social media hmanruaa hmangin he natna vei chhungkuate inhriattawn leh intawiawmna an buatsaih a. Memory Walk pawh hi ARDSI Mizoram Chapter buatsaih a ni.
Kumin thupui chu ‘Never too Early, Never too Late’ (Hma luat a awm lo, tlai luat a awm lo) tih a ni.