Russian President Vladimir Putin chu nikhat chu amah hnaih ber bertu zinga mi ten an la that ang tiin Ukraine president Volodymyr Zelensky chuan a sawi.
Newsweek report danin he thu hi Zelensky hian Russia-in Ukraine a run kumkhatna puala documentary ‘Year’ tih an siamah a sawi niin a tarlang a. Document hi kar kalta Zirtawpni khan tihchhuah niin Zelensky chuan Russian President leadership-ah ‘derthawng’ hun thlengin chutah chu amah hnaih ber bertu tena amah an beih hun tur tiin a sawi.
“Putin regime hi Russia ram chhungah a derthawn hun a awm ngei dawn a, chutah tak chuan amah hnaih ber ber thin ten chet an la ang. Amah thahna chhan tur chhuanlam an nei ang. Zelensky thu sawi an hre chhuak ang a, Putin thahna tur chhan an hria ang a. An that ngei ang em? Aw an that ang a, Engtikah nge? Chu erawh ka hre lo” tiin Ukrainian President chuan a sawi niin Newsweek chuan a tarlang.
Hetih lai hian Vladimir Putin kaihza vengtu ber berte chu an mangang tawh nia sawi a ni bawk a. Washington Post chuan tun hnaiah Russian President hnaih ber ber tute chu a lakah an lawm tawh lo tia sawiin hei hi tun hnaia frontline-a dah sipaite phun leh tap video chuan a ti nasa zual an ti bawk.
Independent chanchinbu erawh chuan Zelensky thusawi chu a thleng dik lovang an ti thung a, a chhan ber pawh tuna Putin a hnaih ber ber dinhmun sang ber ber chelh te hi amah Putin avanga tun dinhmun hi thleng thei an ni a ti ve thung.
Pathianni khan Zelensky chuan Ukraine chuan indona tawp rualin Russia-in a chhuhsak tawh Crimea chu Ukraine kutah a awm ngei ngei dawn a ti bawk a.
“Kan ram a ni a. Kan mi leh sate an ni a, kan history a ni bawk a. Ukraine hmun tinah Ukrainian flag zar a ni ang,” tiin a sawi. Russia chuan Zelensky thusawi hi tun thlengin chhanletna an la siam lo thung.
Amah hnaihtu ten Putin an that ang : Zelensky
Get real time updates directly on you device, subscribe now.