Amarnath Yatra tan niah J&K-ah inkahna thleng
Amarnath Yatra tan niah J&K-ah inkahna thleng
Jammu & Kashmir-a Kishtwar district, Chatroo-ah mi Nilaini tlai khan firfiakte leh venhim hna thawktute inkahna a thleng.
Inkahna hi Jammu atanga Amarnath Yatra biakzina kal turte vai liam an hnu darkar tam vak lovah a thleng a ni.
Police, sipai leh CRPF-ten an thu dawn bawhzuia Nilaini tlaia Kuchal-a mi zawn beihpui an thlak laiin mi firfiakte hian an lo kap a. Venhim hna thawktute pawh hian kap zui vein zan lam thlengin an inbei zui.
Jammu-a White Knight Corps chuan, “Thu dawn bawhzuiin a huhovin Kanzal Mandu, Kishtwar-ah mi dap chhuah beihpui thlak a ni a. Mi firfiakte hian silai an hmet puak ta a, inkahna hi a thleng zui ta a ni,” tiin X-ah an tar lang.
Inkahna a thlen hnuah hian sipai dang tirh belh niin a hmun pawh tumah luh leh chhuah theih loh tura khar nghal a ni tih thuneitute chuan an sawi niin PTI-in a tar lang.
He chanchin ziah lai hian inkahna hi a la awm reng a, Jaish-e-Mohammed (JeM) firfiak pawla tel mi pahnih emaw, pathum emaw vel an nih rin a ni.
Nilaini vek chawhma lam khan Jammu & Kashmir Lieutenant Governor Manoj Sinha chuan Jammu-ah Shri Amarnath Yatra biakzina kal tur hmasa berte chu a vai liam a, kum tin biakzin hi neih ziah niin a bul tanna hi urhsun taka hman thin a ni.
July 3 atanga biakzin tan a nih avang hian a hma atang tawhin biakzinten Baltal leh Pahalgam an zawh ve ve theih nan Jammu-Srinagar National Highway (NH-44)-ah venhimna khauh taka kalpui lawk a ni.
April 9 khan Chhatru ramngawah mi firfiak an awm nia thu dawn a nih hnuah inkahna a lo awm tawh a. Ni thum chhung inbeihna a awm hnuah JeM firfiak pathum kah hlum an ni a, an kut atang hian AK leh M4 rifle bakah ralthuam dang hmuh a ni.
May 22 khan Indian Army, Jammu & Kashmir Police leh CRPF ten a huhova Singhpora, Chatroo-a beihpui an thlaknaah inkahna nasa tak thlengin sipai pakhat thiin pahnihin hliam an lo tuar tawh a. Heng lai ramngaw chhah tha tak hi mi firfiakten biruk nan an hmang thin avangin inbeihna a lo thleng fo tawh thin a ni.