Ambani mo lawmna a perform turin Justin Bieber Mumbai-ah

Justin Bieber chu nimin zing khan Los Angeles atangin Mumbai-ah a thlawk lut a, Anant Ambani leh Radhika Merchant te inneihna tura serh leh sang pakhat, sangeet ceremony a perform turin Ambani chhungkua hian an chhuak rup mai le.
Rihanna, Katy Perry, Backstreet Boys leh Hollywood artist eng emaw zat chu Anant Ambani leh Radhika Merchant te innei tur hian an pre-wedding party hrang hrangah perform turin an lo chah chhuak tawh a, July ni 12-ah an inkutsuih hnua mo lawmna a perform turin Drake, Adele leh Lana Del Rey te pawh an chah chhuak leh dawn a ni.
Sangeet ceremony hi mo lawm tura chhungkhat leh thiantha te tana welcome party ang deuh a ni a, Anant leh Radhika te sangeet pawh hi nizan khan an nei a, Bieber pawh hi he sangeet ceremony-ah hian perform tura chah chhuah a ni.
Bieber hi Mumbai airport-a private terminal-ah a rawn thleng a, T-shirt senno hain, lukhum sen a khum bawk a, a langsar vat vat hle a, airport atang hian pawna amah lo nghaktu car-ah lutin, tawi khawmuang lovin a tlan tlang leh ta nghal a ni.
Justin Bieber hi 2017 khan India-ah a rawn concert tawh a, mahse, khami tum chuan a lip-sync (playback kan tih ang kha) tiin fans an lungawi lo viau a, 2022 khan India-ah concert vawi hnihna nei leh tur a ni a, mahse, taksa hriselna lamah harsatna a tawh avangin a thulh leh ta a ni. Bieber ian 2022 khan Justice World Tour neih a tum a, mahse, Ramsay Hunt syndrome avangin a tour neih tur hi a thulh ta vek a, tunlai hian rimawi khawvelah a rawn kir leh dawn hnai tawh entir nan recording studio-a hla a record lai thlalak leh video te a tichhuak zeuh zeuh a, live show thenkhatah zaithiam dang te nen stage-ah a inlan ve leh ta zeuh zeuh bawk a, tuna India a rawn kal leh hi Ramsay Hunt syndrome avanga a tour a cancel hnua pui tham deuh taka rimawi khawvela a rawn comeback lehna hmasa a ni dawn ta a ni.