Aizawl Municipal Corporation chuan February 21 atanga 25 thleng awh tur Aizawl Day a huaihawt dawn.
Aizawl Day hman tum dan hi sawiin Organising Committee chairman, AMC executive member Laltlanzova Khiangte chuan, hun rei tak chhung “Aizawl Mihlun” tlemte ten Aizawl Day hi an lo hmang tawh thin a, anmahni hman mai duhtawk loin mi zawng zawngin kan hman theih na’n AMC an ngen a. Aizawl Day vawi 133-na hmanna tur hian AMC chuan senso atan cheng nuai 60 a dah a ni.
-- Advertisement --
Aizawl Day Organising Committee chuan Sub Committee hrang hrang – football tournament, cleanliness competition, information and publicity, stall and exhibition, band contest, carnival, cultural leh souvenir and conclave ah a din a. Football tournament sub-committee chuan AMC ward 19 te tel theihna tur February 8 atangin football tournament a buatsaih dawn a, cleanliness competition sub-committee chuan February 8-16 chhung hian veng fai ber an thlang dawn a ni.
Stall and exhibition sub-committee hian February 23-25 chhung Aizawl Sipai Lammualah stall 77 hawn an tum a, ei leh in tur chi hrang hrang tlawm tak tak bakah Mizo thuam hrang hrang an pho chhuak dawn a ni. Band contest sub-committee chuan Lammualah tho hian band contest an buatsaih dawn.
Carnival sub-committee chuan “Laugh Tale” bultumin Cosplay buatsaih an tum bakah naupang atanga puitling thlenga mit titlai tur leh infiamna hrang hrang buatsaih an tum a; Cultural sub-committee chuan YMA Republic Veng Branch bultumin costume parade an neih dawn bakah hmanlai atanga tun hun thlenga Aizawl-in hma a sawn dan hrang hrang an lantir dawn a ni.
Souvenir and Conclave sub-committee chuan February 23 hian NGO hrang hrang hruaitute, chanchinbumite, college leh university-a history leh ethnography department-a zirlaite nen Aizawl chanchin zirhona an buatsaih dawn bawk.
Mizoram khawpui ber Aizawl chu Mizo mipui ta anih angin, Aizawl Day hi hlung taka hmang theuh tur leh kumtin hman tum a nih tawh tur thu Organising chairman Laltlanzova Khiangte hian sawiin, heng hun ruahmana tel turin mipui a sawm a. Aizawl Day sticker a tlangzarh nghal a ni.