AMC-in Aizawl kawngdung tifai

Aizawla Prime minister rawn kal tur lo inbuatsaihna atan Aizawl Municipal Corporation (AMC) thawktute chu Thawhlehni khan Chaltlang leh Chanmari inkar kawngpui leh a chhehvel tifaiin an hnatlang.
Aizawl mayor Lalrinenga Sailo leh Municipal commissioner Joseph H Lalramsanga hoin an hnatlang a, kawngsir hnim samfaiin, railing bal an silfai a. A hmaa lo tihfai tawh Dawrpui leh Zarkawt Venga retaining wall rawng hnawih hna an thawk bawk.
Prime minister rawn zin tura inbuatsaihnaah Thuampui Helipad leh Lammual inkar kawngpui leh Lammual faina leh mawina kawngah AMC chu mawhphurhna pek a ni a. August 26 khan he kawngpui inkara local council 14 chuan hnatlang koin kawngpui leh a chhehvel leh tuiluankawr an lo tifai tawh a, August 30 khan Lammual bawlhhlawh an thianfai bawk.
AMC hian August 27 khan thuchhuah siamin, Prime minister-in Aizawl a rawn tlawh dawn avangin Thuampui Helipad atanga Lammual inkara kawngpui (via Chaltlang leh Ramhlun) leh a chhehvela bungraw dah hnawkten September 5 ralhma ngeia senghawi vek turin a hriattir a. In sakna bungrua hrang hrang – iron rod, balu, rawra leh a dangte kawngkama dahtuten senghawi vek a, motor workshop leh dawr siamten an hmunhma tifai a, an bungruate dawr chhunga senglut vek turin a hriattir a ni.
Heng bakah hian AMC chuan VVIP-in a paltlang tura office-te pawh an hmunhma tifai turin a ngen bawk.