AMC Ward.V-ah KYC kalpui

Aizawl Municipal Corporation Ward No.V-a chengte hriatchian lehzualna atan know your citizen (KYC) software hman a ni dawn.
AMC Ward.V corporator Rosiamngheta sawi danin, tunlai khawvela kan boruak thlirin khua leh tui kan inchian a pawimawh a, data kan neih that a tul tiin, an ward chhunga hman turin software hi an siam a. Mobile application anga kalpui loin, he Ward chhunga local council ho chauhin an luh (access) theih turin an kalpui dawn. Hei hi an ward chhung mi chengte data dahna tur a nih avangin mipui vantlang a duh duhin an luh a, an en theih kha a him loa, confidentiality vawn ngai thil a nih vang a ni tih a sawi.
A zawng zawng data lakhawm turin an la tlin loa, an tlin tawk ni tura an ngaih an ti phawt dawn tih a sawi a. Ward No.V a cheng chu an hming, an thiamna, an EPIC number, phone number leh anmahnia hriat tur tul zual – an hnathawh emaw zirlai an ni emaw a lang anga, an chenpui leh laichin, an inlaichin dan nen a lang ang. Mi in luah nge an nih a, in neitu a lang anga, mi in luah an nih chuan an in neitu hming a lang tel ang.
Mipa leh hmeichhe zat, kum bithliah dan, sakhaw vawn, Kristianah pawh eng kohhrana awm nge an nih, tih a lang anga, an ward/ vengchhung mi tupawh verification certiicate pekchhuah chhan leh an pek dan, an pekte hming a lang vek dawn a ni.
“Kan khawvel dinhmun enin hei hi kan mamawh tawh niin kan hria a, a kimchang vek dawn loa, bul tan tul kan tih avangin kan ti a ni,” corporator Rosiamngheta chuan a ti.