America-ah drugs hluar zual nasa

Americans ram pumpui chu opioid epidemic-in tum li nan tuam leh mekin fentanyl overdose avangin ni tin nunna chan an pung zel tia sawi a ni.
Kum ruk kalta khan Kim Blake fapa Sean chu Burlington, Vermont ah tihpalh thil tia sawiin overdose-in a thi a, kum 27 chauha upa a ni.
“Heng substance avanga nunna chan an awm hian ka na em em a ni” tiin Blake chuan kum 2021 khan a fapa puala a siam blog-ah a ziak zui a. “Chhungkua thenkhatte tihchhiata awmin engkim mai a tawp phah thin,” tiin a sawi.
Khami kum khan US-ah kum khat chhungin drugs overdose avanga nunna chan 100,000 chuang an awm hial a. Heng nunna chan zinga 66% lawih chu fentanyl synthetic opioid heroin let 50 a chak zawk avanga thi an ni.
Kum sawm kalta kum 2010 ah kha chuan US pumah drug overdose avanga nunna chan 40,000 aia tlem an awm a, chuta tanga fentanyl avanga nunna chan chu 10% pawh tling lo an ni. Khatihlai kha chuan nunna chan tamna chhan ber chu heroin leh prescription opioid vang a ni.
Kar kalta khan University of California, Los Angeles (UCLA) researchers te chuan kum 2010-21 inkar chhunga US Centers for Disease Control and Prevention data an lakkhawm hmanga an zirchianna an tichhuak a.
Chuta data an neih hmang chuan tun hnai kum sawm chhunga US-a fentanyl avanga nunna chan tam zia a pholang a ni.
“Dan kalha fentanyl siam chhuah chuan United States pumah nasa taka overdose crisis a thlen a ni” tiin zirchianna neitute chuan an sawi a. US pumah Hawaii atanga Alaska leh Rhode Island thlengin fentanyl chuan a khawih vek a ni, an ti bawk a.
US-ah fentanyl a hluar tial tial a, nunna chan pawh an pung tial tial an ti bawk a.
“Kum 2018 khan Mississippi river khawchhak lamah fentanyl overdose 80% vel a thleng” tiin Chelsea Shover, assistant professor, UCLA’s school of medicine leh he zirchianna co-author ni bawk chuan a sawi a.
Zirchianna an neihah fentanyl mai pawh ni lo cocaine leh methamphetamine avanga nunna chan an pung nasa an ti bawk a. North-east US heng Vermont leh Connecticut velah fentanyl leh cocaine hman a nasa an tia, heng hmun te hi tun hma atanga cocaine hluarna hmun a ni.
Blake chuan a fapa ngei pawhin cocaine a tih thu sawiin mahse a toxicology report-ah chuan a taksaah fentanyl an hmu tel a ti a. Chuta tang chuan ruih rei nan mi tam tak cocaine ti thinte chuan fentanyl an hmang tel tih an hriatfiah thu a sawi bawk.
Dan kalha fentanyl US a lakluh a nih tirh khan mipui ten engahmah an ngai lo, an hnawl, tiin Prof Shover chuan a sawi a. Mahse, a tam tak em hnuah leh drugs dangte aia a man tlawm zawk bawk si avangin an uar ta a ni tiin a sawi.
Addict awl tak mai niin cocaine lo ti tawh tena withdrawal nasa lutuk dan nan an hman thin a ni bawk tiin a sawi bawk a. US state zingah pawh Alaska, West Virginia, Rhode Islands, Hawaii leh California te chu fentanyl avang leh damdawi dang avanga nunna chan tamna tia sawi a ni bawk.
Prof Shover chuan tun hma atang tawhin opioid crisis chu ‘white problem’ tia sawi a nih thin thu a sawi a. Mahse, an zirchianna atang chuan age roup leh geographical line hrang hrangah fentanyl leh drugs dang avanga nunna chan tam ber te chu African American te an ni zawk a ti bawk.
Researchers te chuan US-ah overdose crisis ‘fourth wave’ a thleng mek tiin an sawi a. Chutih laiin chung damdawi tite enkawlna lama hmalakna chu a chak tawk lo an ti bawk.
“Tuna kan treatment system-ah hian drug chikhat chauh enkawlna lam a hawi fur” tiin Prof Shover chuan a sawi a, “Mahse, a nihna tak zawkah chuan mi tam tak te hian damdawi ruih theih chikhat chauh an hmang tawh si lo a ni,” tiin a sawi bawk.
A fapa ngei pawh drugs overdose avanga nunna chan a nih thu sawiin Blake chuan chhungkaw tam takin tawrhna namen lo an tawk tia sawiin, “Tute pawhin chanchin sawi tur an nei a, nu leh pate tan phei chuan an fa duhawm tak chatuanin an hloh a ni,” tiin a sawi bawk a. A fapa chu substance avanga a him theih nan tum tam treatment la a nih thu a sawi bawk.
“Tuna kan mamawh chu treatment la duh tena rang taka khawiah pawh hun rei tak pawh treatment an lak theih nana hmalak a ni” tiin Blake chuan a sawi bawk a. Overdose prevention site pawh siam hial a him zawk leh enkawlna hnuaia drugs ti duhte pawhin an titheih tura siam hial a tul tiin a sawi bawk a.
Blake chuan a pawimawh ber chu heng substance avanga tal buai mek te hriatthiam leh khawngaihna neih a ni, tiin a sawi bawk.