By Tpa Bunghai
-- Advertisement --
“I like to be the first one on the court so i can do my warm up routine” – Joe.
Tunhnaia thla hnih dâwn deuh thaw basketball inelna ngaihhlut, MSL 8 neih zawh taka chhinchhiahtlak leh entawntlak i han hrut thuak teh ang. Mizo essayist hmasa ber, amah Kaphleia khan thingtlang nun nawm loh chhan chu, “kan hriat loh avang a ni!” tiin Mizo hnam tân thahnemngaihna râwl a chhuah thin a nih kha! Chuti ang thahnemngaihna rilru pu ve det det chung chuan American vâl, kum 25 pel awrh, Cristiano Ronaldo te ram Portugal-ah ngei pawh an basketball league sang bera mimal chawimawina (MVP) lo hlawhchhuak tawh, basketball avanga nikuma Asia khawmualpui rawn thleng hlawl, Zonet leh MBBA thawhhona zara Mizoram Super League (MSL) khel tura Zawlkhawpui rawn mawitu, Zarkawt BCA player, Big Joe (Joseph Allen-a) hi umzui zuai hmasa teh ang – ‘kan hriat loh avang a ni!’ tih hmain thalaite rilru puthmang dik petu a nih theih ngei beiseina nen le.
Big Joe hi palian hrawl zet, fit 6’7, ngawichawi leh zaidam zet a ni a, MSL season 7 leh 8 chhung khan a hun hman thin dan pangaiin indoor stadium thleng hmasa ber leh warm up nei hmasa ber a ni ngar ngar – infiammi thenkhat hi chu chibaitu leh thlalakpuitu an ngah hnu hian mahni invawn uluk na lam hi (self discipline) an tlachham thuai zel, kan American vâl hi chu a danglam nalh! Mizo basketball tana sulsutu zahawm, Saron veng Mapuia ang maia tawng tam lo leh ti thawr thawr lo a nihna te hi zeh tel loh a uiawm. “Ka lawm e” tih leh “tih palh” tih nachang hi hnam dang hian an nunpui thiam fâl nalh zel leh, an hawihhawm em em mai te hi tribal Mizo zia-ah hian bet tlat se ka ti vawng vawng fo! Ani Big Joe leh hnam dang midum ho MSL khela rawn inlante nunah khan mak deuh maiin hawihhawmna a par tlat nia. Game khelh laia nasa mangkhenga hrawk hrui phiar tawng tawnga entu mipui thlenga min tawng hreh lo thin kha, MSL 8 chhung khan hnam dang zingah an awm leh pheuh thin. Mahse, hun tawp hamrik a rik rualin Pro Pastor bial vawng thar hlim ang maiin ngainatawm fahranin an zia an thlak leh thut thei, nui sânga inngaitlawm deuha “sorry, my bad” an ti leh thei mai te kha tha deuh a ni. He lama keini Sunde Sikul bân ruala social media lama inchaltauh nghek nghek thin te hian a hun leh hmun an hriatna te kha kharchhawn a itawm.
Kan infiammi zingah nula buanchak lo leh zu buaipui khu luk luk an awm thu a ri leh nulh thin! Kan American vâl erawh hi chuan zial a zu lo nghal pang a, Asian hmeichhe kap karah a tawlh thlu lo mai ni lovin tul tawpah lo chuan a pindan a chhuahsan ngai lo – a va’n invawng teh lul em. Vantlang zingah leh puipunna hmunah tel loh nachang a hria a, thalai thaza rual lek mah ni se, mikhual ni tura a rawn inlan chhanah a chiang a – a ‘everywhere’ mawlh lo! Instagram lamah hmeichhe ‘hi’ kual dun dun lovin basketball piah lam chu a hnungchhawn hmiah vek! A ni tin hun hman dan IG story leh Whatsapp status lama hmuh tur a vâng pharh te hian a professional zia a tarlang.
|ha ber nih a tum a, a bei a, MVP hlawhchhuak a – a nu hnenah a jersey hlan hlân a nghakhlel a sin aw, MSL 7 khan! Pathian thuhriltu te ngei ngei zingah pawh mahni in lum lama chhungkuaa awm thlahlel lo zu han awm thei nia mawle! He American athlete hi chuan Mizo zinga basketball avanga thleng thui ber, Lalrina Renthlei ang thoin chhungkua a dah hlu thiam. Pawn lama pawnto leh party ngaina thalai tam takin kan chhungkua kan dah pawn lang ang hi a ni lo, ani chuan restaurant changkang tak taka ei tur tuihnai ber ber aiin a nu choka paltlang ngat kha a ngai – “i miss my home” a tih khan a nu kutchhuak a dah san zia a va’n chiang teh lul em! Khawlai aiin in chhung zawk hi a ni tur reng a ni.
Big Joe ang tho hian fit 6’10, India National Team tân pawha inlan tawh Gujarat vâl Patel-a chanchin te hi a va’n ngaihnawm bawk tak. Lehkha zir uar leh ngaina chhungkua atanga seilian a ni a, a u mipa Canada rama hnathawka awm mêk sulhnu chhuiin khawiah emaw chuan engineer in lo chi, insum thei zet a la ni ve ngei ang. A ngainat ber basketball hi eizawn nan a hmang zui kher lo a nih paw’n, plan B a nei – foreign emaw India ramah emaw hna tha tak a hual der. Anni mikhual duhawm pahnih hian street food an hnar vek hmiah, pum nuam lo leh ek chhuah thut thut an nei ve lo bur – ei leh inah an fimkhur tak zet.
Lâr leh follower ngahah hian kan mikhual pahnih hi an chiaiin an phi ve chung lova, an mimal nun vantlang hmaa pholan tuarh tuarh aiin an hringnun kal zel turah ngaihtuahna an seng nasa! Mizo thalaite nena inanna kan neih chu – an tualchhung politics vir vêl an buaipui ve hle. Gujarat tlangval phei hi chuan, an State Chief Minister hlui Modi-a a fak ngun fu – kei erawh kan CM chungchang hi vawi khat mah sawi lovin ka ngawi tluan thei!
Gujarat State-ah hian anmahni tawng Gujarati an hmang uar hle a, he lam ai fêin saptawng (english) hi an hmang uar lo thung, thiam pawh an thiam lo ang reng. Mahse, an board of school education lamin hindi a dah pawimawh a, an zir uluk zui nen, hindi chu nâl par par tak an nih thu Patel hian a sawi chul zel. Aizawl khawpui kawng te lutuk leh biboh zet hi mak an ti hle bawk! R. Dengthuama Indoor Stadium panna kawng, Venghnuai chhuk zetah hian an zam ve thei a nia aw! Hringnun kawng chhuk leh chho, bumboh leh biboh deuh hi anni leh keini hian engtin zawh zui zel tak ang i maw?