By Lianhleia, Sihphir Venghlun
-- Advertisement --
ZPM Supremo, Pu Lalduhoma hian TV lama an kawmnaah ZPM Economic Policy a sawi hi Economist-te ngaihdân a ni lo thei a ka hriat avang leh, an lo sorkar hlauh a nih pawha tidanglam tûra ka duh avangin ka rawn ziak ve a ni.
1. Economic Blockade (Protectionism):
Mizoram hi Foreign ram pahnih, Myanmar leh Bangladesh-in a hual, chu bakah state dang Assam, Manipur Ieh Tripura-te hual vel kan ni a. Assam atanga an tharchhuah lo dan chah a sawi hi thil âtthlâk tak a ni. Man tlawm zawka lei theih a nih a, duhna (demands) a awm phawt chuan a man tlawm zawk hi khap ngawt ila, a rúk (clandestine)-a lák luh a ni tho tho thin. History-a kan hmuh angin tuipui hual vèl vek khawvél ram tam tak pawhin Economic Protection hi an tum tawh thin a, inkalpawhna kawng hrang hrang a awm thin tho vângin a hlawhtling thei ngai lo. Duh leh mamawh (demands) a tam chhung chuan to zawkin tumahin Mizo thar/vulh chhuah a nih vâng ngawtin an lei dawn lo. Tlawm zawka phai lam atanga tawlh rúk kha Mizo thar/vulh chhuah angin ram mipui (Consumer) te’n kan lei leh tho tho ang tih hi a chiang a ni.
2. Loan lak dawna State Sorkar Guarantor-a tan chungchang:
Hei hi a hre fuh lo nge mipui duh zawng nia a hriat avangin a sawi ta mai, tih hi ngaihtuah tham a ni. Micro, Small and Medium Enterprises (MSME) leh Central Scheme tam takah hian Central Sorkar hi Guarantor a nihna a awm. Mahse, hèngah hian Project neitu Account-ah sum a awm tih an hriat chian emaw ram pum tána thil thar leh tha bik takte a nih chauhvin Central Sorkar hian Guarantor nihna a nei duh a ni. Aizawl leh India rama Bank tam takte hi zawt ila, Guarantor awm lo emaw dahkham (Mortgage) awm lo emaw chuan Loan hi an pe duh lo tluk a ni. State hi Guarantor ni ta se, Sorkar tan a thlitfimna leh invenna dang a buatsaih loh chuan tu Party pawh hi Sorkar se, Finance Department hian Guarantor nih chu a ngam hauh lovang. Sum enkawl hi sawi mai mai túr a ni lova, uluk leh fimkhur taka tih ngai a ni.
3. “Sawhthing kg-ah Rs. 50, Sorkarin leisak ang, A rate hre sain kan chin tir ang”:
Hei hi Sorkar thenkhatin an tih dán chu a ni ve rêng lah tak a, mahse, Independent nation, ram hausa takte hian loneitu/ran vulhtute a tihbeidawn loh nan leisak a, paihbo (Dumping) an ti ve fo mai. Mahse, keini State rethei tak tân hian hetiang hi sawi loh a him ber. Tin, a rate hre sain kan chin tir ang a, tumah an thatchhe lovang tih hi thil âtthlâk tak a ni. Túnah pawh vawksa chu kg-ah Rs. 400/- a ni tih kan hria a, a tam phah chuang lo. Vawksaah kan la intodelh thei chuang lo. A rate hriat sa hi thar chhuah tamna leh loneitute hausakna a ni lova, thar tama tlawm zawka hralh a, a thartu te’n mi dang laka an lei túr a lo tlawm ve zél hi khawvél Economic Policy dik leh ram mipuite hamthatna dik a ni zawk zél.
Economic dik chu Thar chhuah emaw vulh chhuah tam hi a pawimawh ber a. Kan thar/vulh chhuahte hi a Quality a that a ngai bawk a ni. Quality tha lo, a rate sang bawk si hi Mizo kut chhuak a nih vâng ngawtin Mizo mipui emaw Company pawhin kan lei ngawt lovang. Hmun dang atanga tha zawk, tlawm zawk a awm chhung chuan. Chuvangin Economic Policy dik kumkhua tur chu- Abundant supply of Quality Goods at Competitive Rate (“Tam tak thar emaw vulh chhuah emaw a ngai hmasa, tin, kan thar chhuah leh vulh te hi an that a ngai a. Tin, mi dang, ram dang el pha ngei tura man tlawm a nih a ngai,” tih hi a ni.