AN AWHAWM LOH

By Reuben Lalnunthara Hnamte

Mi tin hian kan naupan lai hun hian awh hi kan ngah duh viau mai a. Kei pawh ka naupan lai chuan awh hi kan ngah ve thin khawp a. |hiante nen kan han titi hova, duh duh herchhuahna khawl nei ila, kan awh a piang herhchhuak ti ringawt khan tlai sikul banah hian kan titi tui ve viau thin kha a ni a. A hun lai chuan a aia nuam kha a awm bik chuang awm lo ve. Chutiang chuan hringnun hi naupan lai atanga puitlin thleng hian awh nei reng reng kan tar thi dawn a ni ber mai. Naupang kan han ni a, tlangval han nih ve kan chak a, nawm hmel riau te hian kan hria a ni. Tlangval kan han ni a, duhzawng tak nupui han neih te kha kan chak a, duhzawng tak nei thei chu mi tlemte chauh an lo ni. Kan duh em em ten min duh lo va, mn duh em em tute kan duh bik lova, chutiang hringnun chu ni kan hman mek hi. Chutiang chuan hringnun chu kan inthlengkual vel mai mai a ni.

Mi nupui/pasal kan awt a, chu chuan uirena leh chhungkaw kehchhiatna bak a thlen si lo. Mi kan awt a, min min awt bawk a, tiang chuan kanin awt kual vel mai mai a ni. Thenawmte motor, in leh lo kan awt a; an nupui/pasalte thlengin. Chu awhna rilru chuan kan rilru chu thil tha lovah hruaiin kawng dik lo kan zawh phah thin. Thianglim lo taka sum lakluh duh nate, uirena te bak heng awhna hian a thlen lo tih theih a ni. Mi nupui/pasal kan awh em em te hi han belhchian chuan engmah an lo ni bik lo, a ho lutuk. Nula/Tlangval i duh em em, amahin a hnawl avanga intihhlum hial i duh te kha han belchiang mah teh, a ho i ti ngawt ang. Tumah hi engmah an lo ni bik lo; kan nihnaah hian lungawi ila; kan chantawkah lungawi ila, tichuan hringnun buaina tam tak hi chu kan pumpelh ngei ang.

Nupui pasal hmeltha tak, hausa bawk si nei ila tiin kan han suangtuah a, kan han nei ta cheng a, ropui takin kan han lawm a. Pathian din chhungkua lo chu a lo nuam reng reng si lo; sum leh pai leh hausaknate hi chhungkaw hlimna a lo ni ikhaw si lo. Chhungkaw keh darh, chaw pawh eiho hlei thei lo, ni tha reng hmu thei ta lo kan hmuh thin hian an awhawm ta loh. Kan thenawm mi hausa tak, an hauhsakna hriat vak si lote chu kan awt thei hle. Ni tin sa leh a tui tui an ei a, thawmhnaw man to tak nen, in leh lo ropui tak an nei. Mahse, an chhungkaw inhau thawm leh an nupa inti thiam lo thawm kan han hre ta reng mai a. An fate lah ruihhlo leh zu ngawl vei nen, an eitui lutuk te chu an tuar lo va, damlohna chi hrang hrang nen an insawisel reng a. Keini karkhata sa ei ve thei tawk te ka lo insit thin nen, mahse kan tan a lo tha daih zawk tih han hriat chuan an awhawm loh.

Mi lar tak tak(Celebrity) kan tithe hi an hlim hmelin, an nuih vawikhatah pawh nuaih tel an hlawh thei a ni a. A nuam dawn mange, an hlimin an nui sang reng a, miten an ngaisangin an bawr luai luai reng mai si a kan ti a ka awt thei em em mai, milar nih ve ta kan chak a. Mi lar tak han nih ve te chu kan chakin, piang vanduai kan inti thei hle. Mahse, han chhui chiang ila, mi lar tak tak ho hi an nun chhungril alo hlim hauh lo mai a, an nun a ruak a, an hauhsaknate, an larnate, an hmelthatna te hian hlimna a lo pe hauh lo mai asin. Nu chawlhna hmu lovin chawlhna an zawng a, an in leh lo ropui leh nawmchenna nuam tak takte chuan an nun ruak a tikhat zo si lo, beidawngin ruihhlo ngawl an vei a, a hun lovah an thi thut thut mai zawng a nih hi tih te kan ngaihtuah ngai em?. Khawvel nula hmeltha chuai thei lo Maryline Monroe ngei pawh kha rilru hahin vawi engemaw zat intihlum tumin, an chhan hman hram thin a, a tawpah chuan a intihlum ta nge nge a nih kha. Mi lar tak tak awm ngaihna hre lo, nun ning leh mahni intihlum ta mai te hi an va tam em!

Khawvel tlangval hmeltha leh zaithiam lar Elvis Presley a ngei pawh kha – a tluka lar leh hmingthang hi khawvelah an awm thei tawh lovang tih mai tur a ni. A nupui hlui ringawt pawh tun thlengin khawvel milar ber te zinga mi a la ni reng a nih hi. Mahse, nun hlimna reng reng hmu lovin, damdawi ngawlvei avangin lungphuchawlin a boral ta a nih kha. Hmanlai lal ram ropui tak tak Aigupta lal ram te, Rom lal ram te, Pompei lal ram te leh adangte pawh tunah chuan hmuh tur reng an awm ta lo. A hun laia ni tla seng lova roreltu ni a, pathian ang hiala inchhal khawpa ropui an intih vei nen khan. Thlan tlaa hnathawk lova hlawh hmu teuh leh hausa viau mai si te kan hmuh hian kan lungawi lo thin a ni lawm ni? Han ngaihtuah chian hian thlan tlaa hnathawh te hi taksa tan a lo thain kan lo ngeih daih zawk a ni tih te hi han hriat chuan heng mite hi an awhawm loh.

Motor changkang tak tak nei thei a, nuam ti awm deuh leh min tham lo deuh ni awm taka chuang thin te han hmuh hian mi tamtak chu kan lungawi lo thin. Engatinge hetianga kan lo pian bik, Pathian pawh hi duhsak bik nei ni te hian kan han puh dawn dawn a, han ngaihtuah chiang ila, kea kal te hi a lo hriselin damreina a lo ni daih zawk a ni tih te kan ngaihtuah chiang ngai em? Ram changkang apiangah ke a kal tam te hi an uar leh tawh zawka sin. Mi ten sikret an han zu a, chawei khamah te an han pak hlat hlat a, kuhva an han ei sen sang maite hi kan it ve thin a. Mahse, han ngaihtuah chiang ila, tunlaiah mi changkang apiangin meizial hrisel lohzia leh mawi loh ziate, pawisa a heh dante hriain an sim tawh a, sorkar meuh pawhin puipunnaa zuk te a khapin meizial zu mi hnawk kan ti tawh zawk. Chutah kuhva ei pawh chu mi a ti tawpin, sum hekna mai mai, taksa tana tha si lo a ni tih te, a ei ho ka sen hemhuamte, an ha balh dante leh kan khawtlang leh inchhung a tihtawp dan te; zuk leh hmuam ti miah lo te chu an hmuh a nuamin an thianghlim zawk daih tih te kan ngaihtuah leh chuan a ti te ho an awhawm loh.

An lakluhna hriat chian si lova lo hausa ta thut te, an hlawh baka sum lalut tun tun thin te kan hmuh hian kan awt thin a. Keini, ni tla vanvuaiin hna kan thawka kan hausa ve mang si lova tiin kan lung a awi thei meuh thin lo a nih hi. Rosum tam tak an nei a, in leh lo ropui tak tak nen, luah sen loh an nei. Mahse, chung an thawhchhuah ni si lova sum tam tak tak neia hausate, rosum tam tak tak neite chu han chhut chian hian an thil neihte chuan a tihlim lo va, a tihrisel hek lova, an lungawi chuang lo tih han hmu hian an awhawm loh. An tu leh fate tana rosum tam tak tak hnutchhiahte chu an tu leh fa ten an chen a, thatpui aiin an chhiatpui zawk tih han hmuh chuan, keini nei ve tawk tawk a kan awm hi a lo tha zawk hle tih kan hmuchhuak thei ang. Kan fate chuan kan neih rosum chen aiin anmahni ngeiin an thawhchhuah khan an thatpuiin an hlim zawk tih te kan ngaihtuah ngai em?

Incheina manto tak taka inchei a, duhtawka sum hman tur nei a, a nuamsa thei ang bera nung thinte hi an hlim bik chuang lo va, an lungawi rei chuang bawk lo tih te han hmuh hian, Kan thawhchhuah tlemte thianglim taka chhungkua kan chawm ve te, kan Incheina neih ve tawk fai taka kan vawn te, kan sum neih ve ang ang ren thiam taka kan hmante chu kan hlimpui zawk hle in malsawmna a ni zawk. Pathianin hriselna min pe a, a tawk chauha kan eitur min pe bawk a, kan mamawh tawk engkim min pe bawk. Heng zawng zawngte hi a va hlu em! Damdawi inah han kal ila oxygen nena thaw tawk tawkte kan hmu a, ni khata an oxygen man tozia turte han ngaihtuah ila; Lalpa hian kan mamawh hi min lova han pe nasa em! Lawmthu sawi mai tur kan lo ni zawk a ni tih i hre thar leh ang u. Khawvela mi awhawm ber chu Pathian tih mi, mahni neih anga lungawi, dik taka nung leh dik taka hnathawk mi, Pathian thlamuanna leh lawmnain a chhun khah te hi an ni.