An hun a thleng, EPL-ah Arsenal an champion

Arsenal in kum 22 zet an lo nghah tawh English Premier League a champion chu an nghakchhuak, a hun a thleng a, 2025-26 season ah khelh khat khelh hmabak nei chungin an champion. Ni e, an champion ‘Next Season’ an nghah a ngai ta lo.
City an tawlhthlu
Thawhtan zan khan table-a hmahruai mektu Arsenal in Emirates Stadium-a an mikhual Burnley chu harsa takin an hneh. Championship a tlahniam tawh Burnley lakah an chak vangin Arsenal hian an hnuai chiaha awm Manchester City lakah point ngain hma an hruai fal a. Khelh khat chauh khelh hmabak an nei tawh. Gunners hian Champion turin City chak zawh loh emaw, Crystal Palace laka chak emaw an la mamawh.
Arsenal an chak hnuin Thawhleh zan khan FA Cup champion thar Manchester City chuan pressure rit takin a delh chungin champions league khelh tum AFC Bournemouth chu Vitaly Stadium-ah an hmachhawn. Bournemoth hi khelh 17 chhung zet tlawm nei lova kal tluang mek, khel tha em em reng an ni a, City tan hneh an harsa dawna a lan vangin Arsenal tantuten Bournemouth leh City inkhel hi an ngaihven leh zual a. Football ngainatuten Vitaly stadium an thlir rawn thup. Rinlawk ang ngeiin City in harsatna an tawk a, chak an mamawhna inkhelah tlawm an pumpelh thei hram chauh.
Champions League khelh phak beisei zui tura chak mamawh AFC Bournemouth hian fim takin an mikhual Manchester City an hmachhawn a, an mualah chak phuin an inlan. City lakah game nghet tha tak an khel a, an nawr let pawh a na thei viau. City in goal thun tumin nawr thin mah se Bournemouth hian City tlarhma an dang hneh viau a, hun tha an pe duh lo. Bournemouth tan hian season kal meka khel tha tak Junior Kroupi chuan minute 39-naah class zetin a pet goal a, si nghak chetha thei tak Donnarumma meuh pawh che hman eih lova siamin hmahruaina goal a thun a. Junior Kroupi goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, chak mamawh City an che hleithei lo zui zel. Inrintawkna sang tak nena inlan Bournemouth in hlauhawm taka nawr tlangin goal thun theihna hun tha zet mai an nei zawn a, hun tawp dawn hnaiah uiawm takin an hun tha neih an hlah ve ve. An hun tha neih hi hlah lo ngat se thochhuak tur awm lek lovin City an bawhbet zui ngei ang.
An him hram hram hnuin City in goal thun tumin thapui an thawh zui leh a, goal post an tih per hnuah goal hmaa hlauhawm bik Erling Haaland a inlar a. Haaland hian minute 90+5-ah pui zeta pet goal in an si phurh a sut.
An si phurh an sut vangin phur thar hluai mah se goal thun belh turin City in hun an nei tawh lo. Chak tum Bournemouth in an nawr zui nghal a, thil danglam thleng awm tawh lovin inkhel a tawp zui a, inkhel hmuhnawm takah AFC Boutnemouth leh Manchester City te chu 1-1 in an inhnehtawk ta a ni.
Manchester City lakah uiawm taka an chak zo lo hi Bournemouth tan a uiawmin a pawi vawng vawng. Chak se Liverpool nen an inkarah point khat chauh a tla zep ang a, champions league khelh phak theihna hun tha an la nei zui thei tur a ni a. Hun tawp dawn tepa goal an chhuah vangin champions league khelh an beiseina mei a mit a. Europa League-ah an lungawi mai a ngai dawn ta a ni. Bournemouth hian chhiarkawp danin Liverpool la um pha thei bawk mah se goal difference-ah goal 6 laiin an inthlau a, an lehpelh theih a rinawm tawh lo
Arsenal an champion
Point 5-a hma an hruai mek vangin Arsenal in champion theih dan kawng hnih an nei. Bournemouth lakah City an chak zo lo a nih chuan Arsenal hi an champion nghal ang a. City in Bournemouth an hneh a nih pawhin Pathianni zanah Crystal Palace an hneh a nih chuan an champion tho dawn bawk. Bournemouth laka City an chak zo ta lo a. City tan Arsenal lehpelh theih an nih ta lova, hlauhthwng thaw dep depa awm Arsenal chu an champion ta a. Delh rittu hlauhthawnna, selna, deuna leh hmuhsitna leh an phurrit dang zawng zawng chu a kiang ta. ‘Nilsenal’ ni thin kha ‘Champsenal’ an lo ni ve ta.
Arsenal hun a thleng
EPL thangkhat lian chuang zet champion tawh lo Arsenal hun a thleng a, kum 22 zet hnuah an champion ve leh ta nawlh. Season kal meka an khelh chho dan enin Arsenal hun a thleng tak zet a tih theih a. Chung lam bel ruat tih danglam ngawt theih a ni lo a tih ngam hial.An el a, an rim a, rim thlu ta a. An uma, an umphak a, EPL torphy ngei chu mittui nen an chawi dawn ta.
Arsenal hian season kal mekah pawh hun pawimawh laka chetsual a, chak loh khut an la ching tho. Mah se, mak deuh chu an chetsual a, an elpuite tan umphak emaw, hnaih theihna hun remchang tha deuh a awm laiin an elpui liante an lo chesual ve leh tlat zel a. Rin loh deuhin an lo tlawm ve leh khut thin. Pep Guardiola siam len Manchester City ngei pawh an tiha mawi lo leh awihawm lo deuhin a chesual ve leh khut thin. Chu chu season kal meka thil thleng fo dan a ni. Heti a nih tlat vang hian tun hi Arsenal champion hun a ni a. An hun a thleng a ni e!
An hun a thleng a, champion an ni ta nge nge hi Arsenal tantute an hlimin an lawm thiam hle. Khawvel hmun dangte rualin Mizoram a Arsenal tantute pawhin thawm an nei ring hle. Kum 22 chhung lo tau nghawng nghawng tawh thin, an champion zawh loh vanga beidawng rum rum thin, chuta kara miin an nuihzat thin kha an hun a thleng, champion an ni ta. An lawmpuiawm e!