An inkar khik karah Carney-a’n zin turin Modi-a a sawm

An inkar khik karah Carney-a’n zin turin Modi-a a sawm
Mark Carney chuan Indian Prime Minister Narendra Modi-a chu tun hnaia Canada-India inkar tha lo mek karah Alberta-a G7 summit-a tel turin a sawm.
Ram pahnih hruaitute hi Zirtawpni tlai khan phone-in an inbia a, Canadian prime minister hian Modi-a hi zin tura a sawm bakah inbiak zui zel ni se an ti niin Carney-a pisa chuan a tar lang.
Modi-a pawhin zin tura sawm a nih thu leh a lawm thu X-ah a tar lang a, June thla laihawla summit-a inhmuh ngei pawh a duh thu a tar lang tel bawk.
Ram pahnihte inkar hi Canadian prime minister kal chhuak ta, Justin Trudeau-a’n an ram leilungah Sikh inlak hran tum pawla an hruaitu thahnaa inhnamhnawiha India a puh atangin a chhe zui viau a ni.
India chuan puhna hi na takin a hnawl a, ‘engmah chhut chianna awm lo’ tia sawiin Canada leh India hian an palai lawk tak takte an inchhuah tawntir zui bawk.
India leh Canada ram inkara khi lian tak hi Canada leilunga Sikh inlak hran tum pawla an hruaitu pakhat thah atanga intan niin Canada-a Trudeau-a sorkar khan he thihnaah hian India inrawlhah a puh a ni.
Hardeep Singh Nijjar-a hi June, 2023 khan Sikh temple tual, Surrey, British Columbia-ah kah hlum a ni.
India atanga inla hranga Sikh-te awmna tur ram, Khalistan tia an sawi din tuma hmalaknaa a thawm na ber pawl pakhat a ni a. India hian firfiakah chhalin hel pawl hruaitu niin an sawi a, amah zuitute erawh chuan hetiang pawl a neih loh thu an sawi thin thung.
Nijjar-a thahna kaihhnawihah hian Indian pali man an ni tawh a, thubuai pawh awrhtir an ni.
Trudeau-a khan prime minister a nih lai khan he inthahnaah hian India a inrawlh niin a sawi a, Royal Canadian Mounted Police (RCMP)-in India hi Canadian leilunga tharum thawhna thlengah hian a meizanghlaptu a ni tih finfiahna chiang tak an nei niin a sawi a ni.
Nijjar-a hi British Columbia-a Sikh zinga tlangtla tak a ni a. Khalistan a din theih nana hma a lakna avang hian a hma pawhin vauna a lo dawng fo tawh thin niin amah thlawptute chuan an sawi.
Thah a nih avanga mi man palite chungthu hi ngaihtuah a la ni rih lo.
Carney-a hian an rama India-in pawi a khawih nia puh a nih laia Modi-a zin tura a sawm hi tul a tih thu Zirtawpni vek khan thuthar lakhawmtute hnenah a sawi.
India hi G7 member a ni lo va, Modi-a hi summit hmasa lamah pawh a lo tel tawh thin thung a. Carney-a hi kumin G7 summit-a kaihruaitu tur a ni a, thil pawimawh tak tak sawiho tur an nei dawn niin a sawi a ni.
Carney leh Modi inbiaknaah hian inpuh tawnna karah ‘dan kengkawhtute indawr tawn zel leh venhimna thil pawh sawiho zel’ tha an tih thu an sawi.
Modi-a hi Hardeep Singh Nijjar-a thahnaah khan a inhnamhnawih a rin leh rin loh zawhna chu Carney-a chuan dan hmanga thu kal lai a nih avangin engmah a sawi a rem lo niin a sawi.
Modi-a zin tura sawmna hi Canada-a Sikh thenkhat chuan an duh lo nghal hle.
World Sikh Organisation chuan ‘Sikh Canadian-te phatsanna’ tiin thu a chhuah a, Sikh Federation of Canada pawhin ‘inphatsanna chiang tak’ a ti bawk.
G7 summit hi June 15-17 chhungin Kananaskis, Alberta-a neih tur a ni a. An sawiho tur zingah ‘khawvel international muanna leh himna, khawvel pum eibara nghehna awm theihna tur leh digital-a intah luh’ chungchangte a tel.
India bakah hian Carney-a hian Mexico President Claudia Sheinbaum a samw tawh a, May khan a tel dawn leh danw loh a la sawi chiang thei lo thung.
Ukrainian President Volodymyr Zelensky leh Australian Prime Minister Anthony Albanese te pawh an tel dawn a. An mi sawm zawng zawngte erawh chiang taka puanna a la awm lo thung.