An inthen hnua a vawi khat nan Pak-Bangla inpawh leh

An inthen hnua a vawi khat nan Pak-Bangla inpawh leh
Pakistan leh Bangladesh ramte chu kum 1971-a ram pahniha an inthen hnua a vawi khat nan an insumdawn tawn leh ta a, sorkar hriatpuia bungraw phur lawng chu Port Qasim atangin a chhuak tih chanchinbuten an tar lang.
Ram pahnihte insumdawn tawnna tur hi February thlatir khan pawmin Trading Corporation of Pakistan (TCP) kaltlangin Bangladesh hian Pakistani buhfai tonne 50,000 a lei dawn a ni.
“A vawi khat nan Pakistan National Shipping Corporation (PNSC) lawng lian bungraw phur chu Bangladeshi lawngchawlhnaah a zin dawn a, tuipuia insumdawn tawnnaa chhinchhiah reng tawh tur a ni,” tiin The Express Tribune chanchinbuin a tar lang.
East Pakistan ni thin chu Pakistan atangin kum 1971 khan indangin Bangladesh ram hi a piang a ni.
Bangladesh-in indan a sual lai atangin an intithiam lo nasa a, hemi hnuah pawh inbiak that zui loh reng niin tun hi an inthen hnua sorkar hriatpuia an insumdawn tawnna hmasa ber a ni.
February thla tir lama inremna an siamah chuan Bangladesh hian buhfai a leisak ang a. Thawh hnihin Pakistan hian a thawn lut dawn a, tun tuma a thawn bak tonne 25,000 chu March thla tirah a thawn leh dawn a ni.
Kum tam tak chhung intlawhpawh tawh lo an intlawhpawh leh hi sumdawnna kawnga inthlun nghehna leh thil dang zela an insumdawn tawnna tura tangkai a nih ngei a rinawm niin tar lan a ni.
Bangladesh-ah hian nikuma prime minister atanga Sheikh Hasina-i paih thlak a nih hnuah ram pahnihte inkar hi tihzim hret hret a ni a, sorkar hotu lian tak takte pawh an indawr nual tawh niin chanchinbu chuan a tar lang.
Bangladesh sorkar lailawk ding mek hian Pakistan a kawmngeih thar a, hei hi Islamabad pawhin a lo dawngsawng tha hle niin tar lan a ni.