Dr. C. Lalrampana
-- Advertisement --
A KAMKEUNA
Kalkawng hi a van pawimawh tehlul em! Kawng chu a te emaw, a lian emaw, a zim emaw, a zau emaw, alkatra luan emaw, luan loh emaw, a hnai emaw, a hla emaw, a chhãwng emaw, chhãwng lo emaw, a bumboh emaw, bumboh lo emaw, a zim emaw, a zau emaw, a kãwi emaw, a ngil emaw, a mawi emaw, mawi lo emaw, a tluang emaw, tluang lo emaw, a engapawh chu ni fahmiang? kawng awm lovin hring nun a famkim thei lova khawsak ngaihna a awm hek lo. Kan upaho phei kha chuan kalkawng dala awm leh mi harsatna siam chingte kha an huat ber leh an duh loh ber thil a ni. Kan Zoram khawvel leh abikin Aizawl khawpuiah phei hi chuan Kristian duham, verther leh pamham kan tam tawh em avangin mahni tãnghma hai reng renga khawsain thenawm inhnaite te eti lovin kalkawng inkian tha duh lo, kalna mumal nei lo leka innekchepte hmuh tur tam tak an awm. Sorkar inhmun ruahman dan ang thlapa thenawm inkalpawhtawnna engkim duansa awm thlapte pawh mahni tana humhalh lui duh tlat tam tak an awm mek. Hetianga harsatna siam chingte hian eng rilru nge an put thin le? Inngaihtuah Chiang mawlh teh se.
ENGE AN KIH HNAWK CHU?
Kan Zoram Sorkar pawh hi mimal duhãm uchuak ang mai, mahni tãnghma chauh ngaihtuah, thuhnu dãwn lo, chhuanmang rorel ching; hnunga lokal lehzel turte tana tlukna lung leh dalna lung, mite harsatna thlentu; kalkawng dãla inkih hnawk khum ching an ni em tih hi ngaihtuah tham tak a ni. MNF ministry hmasa 1998-2008 lai khan The Mizoram Middle School & High School (Provincialization) Rules, 1987 behchhanin sum leh pai awm sa nei hauh si lovin zirna in engemawzat dinhmun sang zawkah a dah chiam tawh kha a ni a. Khatih laia Chief Minister (1989-1998) Pu Hãwla pawh khan a huphurh hle a niang-MNF ministry te kih hnawk then fai a ngaih dawn thu a sawi kha kan la hre theuh awm e. A huphurh leh sawi lãwk ang ngei khan ministry a lo inthlaka Pu Hãwla khan sorkar hmasa kihhnawk vahchap hling bawn leh thing luang buk pui puite chu Congress Sorkar khan a phur ta a, tun thleng hian a nghawng chu nasa tak a ni a, khang an kihhnawkte kha tun thlengin an nih tur ang (full fledge) pawhin an la kal thei lo a ni.
Hetiang a nih mek lai hian 27.9.2023 a Chief Minister Pu Zoramthanga hoa Council of Minister thukhawm chuan adhoc grant-in-aid sikul M/S 48
H/S 120, HSS 12 GT 180 chu 01.10.2023 atanga chhiarin Sorkar sikulah a hlãngkai a. Henga thawktu zawng zawng hi mi 2,748 an ni.
Hei bakah hian lumpsum grant-in-aid school 52 chu provisional adhoc GIA ah an dah a. He dinhmuna hlankai takte hi higher secondary 34, high school 11 leh middle school 7 an ni. Provisional adhoc GIA hnuaia thawk zirtirtute chuan half basic leh half DA angin hlawh pek an ni ang a. Hei hi sorkar kumthar (2024-2025) atanga hman tan tur a ni.
Hei bakah hian lumpsum GIA school-te chu sorkar atanga tanpuina an dawn thin Council of Minister chuan category chi thuma thenin tihpun a remti bawk a ni.
A TLÃNGKAWMNA
India ram state/UT mipui cheng tam zawng zel mila chhuta leibã ngah ber, azawna kum khat chhunga pawisa puk ngun ber hian Kumin budget 2023 passed takah khan kan leiba tura langsa chu Rs13,584 vbc a ni a, puk belh ngai tur
Rs 2,479vbc nena chhutin Mizoramah chhungkua 230,000 awm angs chhutin chhungtin cheng nuai 7 theuhin bã kan inchankim thei chiah tihna a ni a. RBI statement-a leibã a zawna nei tam ber kan ni ãwm a. Tunah hian Rs 1,442 vbc rulh tur kan nei a, a pung rulh tur Rs 662vbc nen phei chuan leibã rulh tur belhlhãwm hi a vaiin Rs 2,104vbc kan nei mek tihna a ni. Heng baka kan leibã neih sa neuh neuh tårlang ila -Sorkar hnathawk Pensioner-te sum Rs 185 vbc; Health Care scheme chhungkua 13,635 bill Rs 6,289 nuai; Health Dept. Contractors & suppliers-te bã Rs 1,974 nuai Power chhit man Rs12,401 nuai PWD Contractor Bill Rs 21,967 nuai. Hetiang a nih mek lai kara Sorkarin bat belh tur sorkar Sikul 180 leh GIA Sikul 52 dinhmun tha zawka a hlãngkai vuh mai te, lump sump GIA sum a tihpunte nen hian lãwmawm hlein lang mah se, sorkar thar lo piang tur tana phurrit mai a ni dawn tih chu chiang taka lang sa a ni. Tin heng bakah hian Sikul Education department-ah MR Teacher 844 leh SEDP Teacher 777 vel an la awm che u bawk a; tuna ministry hian sorkarna a chang zo ta lo a nih phei chuan hengho hi an maipãr thlawn vek dawn a, an lungawi lovin law court-ah zualkovin sorkar lu tihaitu an ni lehnghal ngei ang a, chutih rualin tuna provincialised tharte atangin zirtirtu mi 2,748 zette’n an dikna chanvo an han ngiat veleh anga, a hmaa leibatsa tam bawk nen hei hah, hui hah tih mai loh chu hma bak kãwl eng tur a vang hle ang. Chuvangin, Sept. 27, 2023-a Council of Minister-in Sikul dinhmun tha zawka dah a rel hi Sorkar thar tur tana kihhnawkna hling bawn mai a nih hmel hle. I lo thlir zel phawt mai teh ang.