An mualah Chelsea chak zo lo

April 4, Thawhlehni zan khan English Premier League-ah inkhel pali a awm a. Inkhel ngaihven hlawh takah Chelsea leh Liverpool te chu goal awm lovin an inhnehtawk. Inkhel dangah manager nei lova awm mek Leicester City chu an khelmualah tlawmin, dinhmun derthawng zawkah an ding.
Goal thun harsat Chelsea
Stamford Bridge-a inhmachhawn team lian pahnih Chelsea leh Liverpool te hi season kal meka beisei phak lo an ni a. Manager nei lova awm mek Chelsea hi 11 naah an awm a, Liverpool hi pa 8 naah an awm ve thung. Stamford Bridge-ah goal awm lova an inhnehtawk vangin hma an sawn thei lo ve ve.
An mualah ngei Aston Villa hneh lova tlawm hlimhlawl Chelsea hian Liverpool hneh ngei tumin tan an khawh a, khelh pawh an khel tha viau. Goal thun theihna hun tha an neih nual bakah an goal thun pahnih ngawt hnawlsak an ni bawk. Tlarhma player hriam an neih loh bakah an goal thun pawmsak an ni lo zel bawk nen Chelsea vanduai zan a tih theih.
Blues hian Reds lakah bul an tan tha a, fuh taka an mikhualte an nawr tlang hnuin loan-a an hawh mek Joa Felix chuan goal thun theihna hun tha a nei a, holam takin a hun tha neih a khawhral thung. Hemi hnu lawk hian midfielder Mateo Kovacic pawhin a hun tha neih uiawm takin a hlah ve bawk. An hun tha an hlah zawn hnuin Recee James chuan kawh zetin a pet goal a, offside an awm vangin James goal hi hnawl a ni a, Liverpool an him nawn leh. An him hram hram hnuin Liverpool tan hian Nunez leh Fabinho ten an hun tha neih an hlah ve leh a, goal an thun thei bik lo.
Chawlhlawk hnu lamah pawh mualneitu Chelsea an khel tha chhunzawm a, Liverpool an nawr buai leh viau. Kovacic-a’n uiawm taka hun tha a hlah hnuin Kai Havertz chuan khalh tlangin goal a thun a, hand ball vangin he goal pawh hi hnawl a ni leh bawk a, Liverpool an him nawn leh. Goal thun tumin innawr tawn thin mah se goal an thun thei lo ve ve, goal awm lovin an inhnehtawk zui ta a ni.
An mualah an chak zawh loh vangin Chelsea hi 11-naah an awm chhunzawm a, an dinhmun a tha lo hle. An mikhual Liverpool khan khelh 28 atanga point 43 hmuin pa 8 naah an awm mek a. An chung chiaha awm Aston Villa aia an khelh tlem zawk vangin Europa Conference League khelh phak theihna hun tha Reds hian an nei.
Foxes an tlawm
Thawleh zana inkhel dangah manager nei lova awm mek Leicester City chu an mikhual Aston Villa lakah 1-2 in an tlawm a, table hnuai ber dawttu an luah nghet.
King Power Stadium-a lenglut Villa tan Chelsea an hmachhawn tuma goal hmahruai thuntu Ollie Watkins chuan minute 24-naah hmahruaina goal a thun. Goal an chhuah atanga minute 11-naah Harvey Barnes chuan goal thunin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Foxes hi dinhmun chhe zual zawkah an tlu lut a, minute 70-naah Kiernan Dewsbury-Hall hnawhchhuah a ni. Tlem zawk an nih vangin an mikhualte dan an harsat a, hun tawp dawn tepah goal an chhuah phah ta hial. Villa tan hian minute 87-naah Bertrand Traoré chuan chakna goal a thun a, point thum an hmu zui ta a ni.
Table hnuai lamah luahtu AFC Bournemouth pawh an mikhual Brighton lakah si hnih faiin an tlawm a, dinhmun chhe zawkah an din phah ve bawk.
Chawlhlawk hnu lamah inkhel a hmuhnawm lehzual a, goal hnih leh red card pahnih hmuh tur a awm. Minute 58-naah Harry Kane leh Everton midfielder Abdoulaye Doucoure te chu mual laiah an innawr deuh nak nak a. Abdoulaye Doucoure hian Kane hmaiah tak a nem siah vangin hnawhchhuah a ni. Kane hi hun rei tak chhung enkawl a ni a, enkawl a nih chhung zawn hian a tider-ah ngaiin Everton bench a thute an lawm lo viau thung. Chak mamawh tak chunga tlem zawk an nih vangin Everton dinhmun a chhe leh zual a, goal an chhuah zui ta reng bawk.
Minute 68-naah defender khel tha tak Michael Keane-a’n Cristian Romero a tihtluk vangin penalty a chawi. He penalty hi Tottenham tana goal thun hnem ber Harry Kane chuan si nghak Jordan Pickford rin loh lamah chiang zetin a pet goal a, hmahruaina goal a thun.
Tam zawk ni chunga hma an hruai vangin Tottenham dinhmun a tha viau a, point thum hmuin, pathumnaah inhlangkai ngei tura ngaih an ni hman. Chak theihna hun nei tha viau mah se hun tawp dawnah Everton nawr let an tuar lo thung. Goal thun belh a, an hmahruaina tihzau belh an tum laiin minute 88 naah Tottenham midfierl Lucas Moura chu hlauhawm taka a chet vangin hnawhchhuah a ni. Bench atanga lut Moura hnawhchhuah a ni hian Everton a fuih phur thar a, An si phurh sut ngei tumin tan an khawh zui nghal chat bawk.
Lucas Moura hnawhchhuah a nih hnu lawk Everton defender Michael Keane chu ropui takin a inlan. Penalty chawitu Keane hian minute 90-naah yard 25 zet a hla atangin goal ropui a thun a, goal ropui hmangin an si phurh a sut. He goal ropui hian chak ngei tawh tura inngai Tottenham a barakhaih chiang hle. 1-1 a nih hnuin goal dang a luh belh tawh lova, inkhel hmuhnawm tak chu chak zawk awm lovin an tin zui ta a ni.
An hmahruaina hum zo lovin, point thum hmu zo bik lo mahse Tottenham hian an chunga awm Manchester United an lehpel a, top 4 huangah an kir ta tho. Spurs hian khelh 29 atanga point 50 hmuin palinaah an kaisang a. Top 4 huang luah phak tuma an elpui lian Manchester United leh Newcastle United te nen point 50 theuh an hmu a. Tottenham hian Newcastle leh United te aiin vawi hnih ngawtin an khel tam zawk mek thung.
Palinaah awm rih mah se Tottenham dinhmun a him lo viau thung. Tottenham aia khel tlem Newcastle leh United te hian hnehna an chang a nih chuan Tottenham hi panganaah an tlahniam ang a, parukna Liverpool nen an inkar a zim viau thei dawn bawk. Manager nghet nei lo va awm mek Spurs tan hian champions league khelh phak theih a nih laiin Europa League pawh khel phak lo va tlak hniam theih a ni tho bawk a. Season tawp hma chu an tan mar reng a ngai ang.
Khingpui hautak Tottenham lakah point an hmuh vangin Everton in him theih beiseina an nei sang leh zual a, point 27 nen 15-naa awm mek an ni a, manager Sean Dyche hnuaiah kawng dik an zawh leh mek a ni.