An mualah PSG an tlawm

An mualah PSG an tlawm
Zirtawp zana French Ligue 1 khelhah champion lai Paris St-Germain chu an mikhual Nice hneh lovin an tlawm a, hei hi manager thar Luis Enrique hnuaia an tlawm hmasak ber tum a ni.
Parc des Princes-ah champion lai PSG hmachhawna leng lut Nice hian bul an tan tha a, minute 21-naah Terem Moffi chuan vanneihthlak ang reng taka pet goal in, hmahruaina goal a thun nghal. Mualneitu PSG hian goal chhuah hmasa bawk mah se si an phurh rei lova, goal an thun ve thuai. Dembele-a’n ho taka a hun tha a hlah hnuin minute 29-naah an super star Kylian Mbappe chuan defender Hakimi siamsak atangin goal a thun a, an si phurh a sut.
Chawlhlawk hmaa goal dang a luh belh theih loh hnuin chawlhlawk hnu lamah Nice in goal an thun leh thuai. Minute 53-naah Gaëtan Laborde chuan hma an hruai nawn lehna goal a thun. PSG in an si phurh sut tuma tan an khawh luatah an chesual nawn leh. Nice hian fuh takin an nawr tlang a, goal hmahruai thuntu Terem Moffi chuan inringtawk taka ball a khalh kual hnuin lei hrulah a pet goal a, an hmahruaina a tizau.
Si hnih ngawta an hnufual hnuin champion lai PSG in goal thun ngei tumin tan an khawh nawn leh a, hun tawp dawn hnaihah an che fuh ta nge nge. A hun tha a hlah hnuin Mbappe chuan minute 87-naah mawi zetin a hlap lut a, an si phurh a sut then. Mbappe goal hnih hian PSG tlawm tur a chhan him zo lova, an tualzawka ngei Nice hneh lovin an tlawm zui a ta a ni.
Kum 34 mi Fran-cesco Farioli enkawl Nice hian zirtawp zana an hneh PSG an lehpel a, khelh nga atanga point 9 hmuin pahnihnaah an inhlangkai. Ligue 1-ah hian khelh nga atanga point 10 hmu Monaco in hma an hruai mek a. Champion lai PSG hi khelh nga atanga point 8 hmuin, pathumnaah an awm ve thung.