An puala hun hmanah inkhawm pui

North East India Christian Council (NEICC) Shillong ngenna angin India hmarchhaka Kristian kohhran zawng zawngten Jnauary 9 khan Manipur-a chi leh chi inkara buaina a reh a, remna a awm theihna’n tawngtairual hun an hmang a. Central YMA ruahmana Manipur atanga raltlan, transit camp-a awm mekte chu Mission Veng Presbyterian Kohhran biak inah inkhawm pui an ni.
NEICC ngenna angin kohhran hrang hrangte hi tawngtai thupui thlanchhuah paruk hmangin an tawngtai rual a. Manipurah Pathian thiltihtheihnaa remna leh muanna a awm theihna’n, buaina avanga nunna chan ta chhungte tan, mahni chenna hmuna awm ngam loa an sahimna zawnga raltlante tan, biak in halsak kohhran hruaitute leh kohhran mipui tan, Manipur-ah Kristianna leh kohhran tih borala a awm loh na’nte tawngtai a ni.
Manipur buaina avanga kohhran tinte Pathian aua tawngtaina hunah hian Central YMA hruaitute chuan raltlante tana Transit Camp an siama awm mek mi 30 chu Presbyterian Kohhran Mission Veng biak inah an inkhawm pui a. An zingah hian Manipur Chandel District, Khodamphai khuaa American Baptist Church hruaitu Upa Phaikhosan (49) pawh a tel a; nunau engemawzat an awm bawk.
Central YMA chuan an office/ hall-ah June 2 atang khan Manipur atanga sahimna zawnga Mizorama rawn tlanlut, belh tur bik neilote tan an awm lailawkna tur, transit camp a siam a, tun thlengin mi 512 tlu lut tawhin, heta tang hian Aizawl khawpui chhung YMA Branch 12 hnenah a tul anga riahna leh ei leh in tur te lo pe a, lo enkawl rih turin sem darh leh thin an ni.