An sorkar hotu dan a nih vangin Bangladesh-in Indian palai ko

Bangladesh chuan Dhaka-a Indian palai lawk pakhat chu an prime minister, Tarique Rahman-a adviser pakhat, New Delhi thlawhna tumhmuna darkar eng emaw zat hren leh thu zawh fiah nia sawi chungchangah thu zawh fiah turin a ko va, inthenawm ramte inkara boruak thar a awm leh mek.
Foreign Minister Khalilur Rahman-a chuan he thil thleng hi ‘beisei loh leh vanduaithlak tak’ tiin a sawi a, Dhaka chuan Thawhtanni tlai khan Indian Deputy High Commissioner Pawan Badhe-a hnenah thil thlenga an ngaihdan a thlen bawk.
Sorkar ⁠strategy adviser Zahed Ur Rahman-a hi conference-a tel tura a zin, New Delhi a thlen veleh an lo dang a, darkar eng emaw zat zawhna zawh a nih hnuah a kaltlang phalsak a ni tih Bangladeshi thuneitute chuan an sawi.
He thil thleng chungchang hi Indian foreign ministry chuan engmah sawi a la nei rih lo.
He thil thleng hi ram pahnihte inlaichinna a derthawn hle laia thleng a ni a. Kumin kum tir lama Tarique Rahman-a’n inthlana hnehna a chan hnuah inlaichinna tha thar hret mah se kum 2024-a prime minister hlui, Sheikh Hasina-i paih thlak a nih hnua an inkar tha lo chuan ngai a la awm thei lo va. Bangladesh hian an hruaitu hlui hi an rama hruai haw turin ngenna vawi tam tak thlen mah se India hian a la chhang lo va, a la awm reng a ni.
Bangladesh-in Indian thuneituten lehkha pawimawh nei mumal lova pemte nawr let an tum nia an sawi chungchangah pawh ram pahnihte hi an inrem lo hle a. Dhaka chuan an ramri vengtuten tun hnaiah ‘hetianga nawr haw tumna’ vawi eng emaw zat an dang tih sawiin, kar hmasa khan New Delhi-a Border Guard Bangladesh leh India-a Border Security Force-te inbiaknaah he thu hi an sawi chhuak a ni.
Inbiaknaah hian an pahnih hian an inrem a, thu pawimawh rang zawka inhrilh leh ramri venhimnaa inremna tur siam ni se an ti a. Hetih mek lai hian dan lova pemte chungchang hi inthenawm ramte inkara buaina siamtu a la ni reng tho a ni.
India leh Bangladesh hi inthenawm tha tak an ni reng thin a, kum 2024-a mipui thinrimin Hasina-i sorkar an paih thlaka Delhi-a a tlanchhiat hnuah a chhe zui ta a. Hasina-i thlaktu sorkar lailawk a din lai phei chuan an intitha lo zual hle a. Kumina mipui thlan sorkar a din leh hnuah a ziaawm leh ta hret a ni.
Heti chung hian an inkarah neuh neuh a awm reng a, a bikin ramri hrula dan lova inluhchhuahna a tam avangin a tam zual thin.