An thutiama ding zo loah ZPM puh

Congress sawrkar hnuaia minister hlui KS Thanga zuitu thenkhat chuan ZPM party an zawm hnu ah, party hotuten an tiam angin KS Thanga hi party vice president-ah an dah leh si lo niin an sawi.
Tunhnaia Congress party chhuahsan KS Thanga hi ZPM-ah a lut a, amah zuitu mi thenkhat a luhpui a ni. Heng zing amite hian tunhnaiah ZPM chu chhuahsanin MNF party an zawm a, an zawm chhan thuthar thehdarhtute hnena an sawi danin, ZPM hian an intiam angin KS Thanga hi nihna an pe loa, an bum vangin an chhuahsan leh nghal tih an sawi.
ZPM-a a an luh hma in, ZPM hruaituten an pu, KS Thanga chu vice president-a dah turin an intiam a, an inbiakna voice record thlenga an neih thu an sawi. ZPM chuan KS Thanga chu vice president-a an dah theih loh tur an sawi leh avangin bumtu party ZPM chu beidawng takin an chhuahsan leh tih an sawi a ni.
An insawi danin, KS Thanga zuitu mi 100 chuang chuan MNF an zawm a. KS Thanga erawh engmah beisei nei loa ZPM-a lut a nih avangin a chhuah ve loh thu an sawi. MLA leh minister a nih laia mi tangkai tak ni thin KS Thanga chu nihna zahawm ve tawk tak nei se an duh ber tih sawiin, ZPM chuan an bum mai bakah an hotute inlungrual lohna a nasat em vangin awmzui rengna tlakah an ngai lo tih an sawi.