K.Hmingthankaia
-- Advertisement --
Birth Certificate kan siam thei titute thu leh hla hi kei chuan ka hmu ve lo. Mahse, a hmutute sawi danin, ‘Raltlan tan pawh kan siam thei’ an la ti cheu a nih chu mawle!! An mawlzia leh an zahtheihlohzia hi a va rapthlak zawk em! He thu LPS Chibai Mizorama ka ngaihthlak ruala ka thinur chuan, ‘Dan bawhchhiatna a ni a, Case siam sak theih an ni’ ti ringawt lovin, a ti awm leh ti thei tuin Case siam saka man nghal tur alawm. Vawiin lama thawm dang engmah a awm loh chuan, ka phak tawkin a theih theihnaah ka aupui dawn a ni, ka lo ti ve nasa mai a. Nimahsela, Central YMA lamin, a ni la lain an lo bawhzui chat mai a, a va lawmawm em. Dan leh hrai hre map lo, Sawrkar leh Departments hnathawh dan leh kalphung hre reng reng lo. Thil pawi leh hlauhawm leh zahthlak pawh hre lo khawpa mi mawl zaktheilo an ni. Hetiang ho buaipui ber leh tuipui ber chu, kut tlingloa pawisa neih dan leh, an thiam ber chu social media hmeh zut zut leh bih ngut ngut chiah a nih hmel.
Hetiang khua leh tui tana chhenfakawm lo lutuk tak kan lo tam tak em em nachhan chu- Lehkhabu chu sawi loh, ni tin chanchinbu leh hunbi nei pawh chhiar ngai lo. TV-a Mizoram leh ram dang chanchinthar en ngai lo. TV-a inkawmhona leh thu tha leh pawimawh sawi pawh bengkhawn ngai lo. Mi tak tak bula khawsa ngai lo. Nileng zankhuaa social media bih ngut ngut thin. A chang leh mahni chauha nui vur vur thin. Mahni level-pui chauh kawm thin. An thu hriat chhun leh thuziak an hmuh chhun pawh, anmahni anpuite thu leh hla social media ami chauh, mahse, intifing em em si te, ‘Chhuan bengtlalo’ ho kan lo tam tak vang hi a ni.
Nimahsela, mahni hma chauh sial tawhna, mahni thu thua awm tumna, ‘it’s my life’ tih tawhna khawvelah hian, atu-a-te mah hi a ruh langa inhrilh leh inzilh inzilh pawha danglam thei hi kan awm ta mang lo a nih hi. Khawvel tar tawh, hun hnuhnunga thil awmzia tur, Bible min hrilh lawk a ni miau si a.
Amaherawh chu, hetiang teh nuai karah pawh hian, khawvel tan leh mahni mihringpuite tana thil tha leh hmasawnna tur leh, thiamthil thar la ngaihtuah char chartute, mahni mihringpuite himna tur leh damna turte, mahni hnampui leh mahni ram leh hnam tana thil tha ber duha theihpatawp la chhuah hram hramtute leh, an fin, an thiamna leh taimakna nena la tang fan fan tute thu leh hla leh, an theihtawp chhuaha thahnemngai taka la bei hram hramtute hi chu i zah em em ang u. Anmahni vanga la thlamuang thei, awlsamna nena hma lam pana la dam khawchhuak thei hram hram kan nih hi.