ANPHUI THATNA

-Dr. C. Lalrampana
A KAMKEUNA
Khawvel hringmite hi kan tlãkna mual a danglam angzia zelin kan duhzawng leh ngainat zawng pawh a danglam thin. Ramhmul damdawia hman chi, chihrang hrang pawh hi kan chenna leilung leh ramhmul awm dan azirin kan hman tangkai dan a inang tlang vek lem lo. Abikin NE India tribal-te hmelhriat leh chin uar êm èm ramhmul damdawi chikhat hi belchiang teh ang.
ANPHUI CHU ENGNGE NI?
Anphui/Phuihnam kan tih hi a scientific hming chu *Clerodendrum glandulosum (syn. Clerodendrum colebrookianum)* tih a ni a, saptawng chuan *glorybower, bagflower & bleeding-heart* tih a ni. Phuihnam hi *East Indian glory bower* tih hial khawpin NE India Tribal-te hian kan ngainain kan hmelhriat tha hle. Phuihnam hi chihrang hrang 400 lai a awm nia hriat a ni. A tui chi leh tui lo chi bakah a lak hun azira tui leh tui lo, khak hun lai bik riau pawh a nei thin. Phuihnam hi Asia, India, Myanmar, Bangladesh, Malaysia, Indonesia, Thailand, Bhutan, Nepal China-ahte an hmelhriat hle a. India ramah chuan hmar chhak state leh ‘W’ Bengal, Sikkim-ahte a tamin an ching uar zual a ni.
A THATNATE
Anphui/Phuihnam hnahah hian steroids, phenolics, terpenoids, flavonoids, tannin, glycosides-te a awm tha hle. Heng bakah hian amah hi colebroside A; diglucoside fatty acid, glycerin, colebrin A-E awmna a ni; C29 sterols, colebrin ‘A’ leh colebrin B, clerosterol-te a keng tha hle tih hriat a ni bawk.
India hmarchhaka hnam chihrang hrangte hian phuihnam hi damdawi atan kan hmang tangkai hlawm hle a, kan hman dan erawh a inang diak diak lem lo nain inanna lai pawh a awm nual tho bawk. Kan hman dan chihrangte chu:
Meghalaya:
Meghalaya state-a cheng khasi leh jaintia hnam rangte-ho hian phuihnam hi ruhseh, atan an hmang thin. A kung rim hnim hian naupang natna chihrang tam tak a tidam theiin an ngai.
Manipur:
Manipur state-a cheng meiteiho hian phuihmam hnah leh a zung hi natna chihrang hrang enkawl nan leh khuh, vun natna leh santen damdawi atan an hmang thin.
Arunachal Pradesh:
Arunachal pradesh-a cheng abor-hote hian phuihnam hnah tui sawr leh purunvar tui sawr chawhpawlhin thisensang damdawiah an hmang thin a, a hnah chhum tui ringawt pawh an hmang tel bawk.
Assam state:
Assam state-a cheng tribal bodo, garo etc. te hian phuihnam hnah chhum hi thisen sang enkawl nan an hmang thin.
Nagaland
Naga-ho hian Nizote ang bawkin chawhmeh atana an hman bakah, thisensang dandawiah an hmang tangkai hle.
Sikkim:
Sikkim-hote pawh hian phuihnam hi an ngaina ve hle a, a hnah chhum tui hi thisensang enkawl nan an hmang thin.
Mizoram:
Mizote phei chuan anphui/phuihnam hi chawhmeh tui pawl takah ngaiin kan ei nasa hle. Uisaa thlak pawlh kan uar a, sachek siam nan kan hmang uar hle bawk. Ruaithehnaah sathau mawm lutuk ei avanga BP sang, zunthlum neite venpui nan chhawp tel a ni chãwk bawk a, hei bakah hian thisensang damdawi atan kan hmang bawk thin.
A TLANGKAWMNA
Phuihnam hi homeopathy, ayurvedic damdawi siam nan an hmang nasa hle a, a zung leh a hnah atanga hriak leh a tui lak chhuah (extract)-te an hmang tangkai hle. Heng bakah hian eknawmna, zunthlum, khawsik damdawi, thluak tihfim nan, sikserh, phinga lungte awm, vun natna, Uithak, Pangti phu, irh thur, khawmual kaikuang seh, Rul chuk, pangti bawk/chawr, kal tha lo, nachhãwkna, anti-oxidant, kawthalo leh a dang tam takah hman tangkai thin a ni.
Phuihnam hi thain tangkai hle mah se, damdawi anga hman tangkai dan kan thiam tawk thin lo. Vawi khata ei teuh chingte an awm fo, thisen a ei naa an chauh phahleh zawk fo thin. Thisensang damdawiah kan hmang duh a nih pawhin a hnah emaw a zung chhum, sawr tui, thianghlim taka thlit fima damdawi ang taka nitin a tawkte tea a dar bi tuk fela a hun taka, khel lova ei thin hi a tha ber tih i hre theuh ang u.