April 1 hmaa lak nghet ngen

Lumpsum school \henkhat, provisional adhoc status-a sawrkarin hlankai a remtih tawhte chuan kumin April 1 hma ngeia hriattirna chiangkuang tak nena an dinhmun tichiang turin an ngen tih an sawi.
Mizoram Government Provisional Adhoc School Association thuchhuak chuan, hun rei tak khawtlangin a lo enkawl tawh lumpsum school thenkhat chu 2023 September 27-a Council of Ministers thukhawmin provisional adhoc status-a a hlangkai chu khawtlang leh school zirtirtute an lawm em em a, tun sawrkar leh anmahni enkawltu minister-in kalpui chhunzawm zel tur a nih thu a sawi chu lawmawm an ti a, an harsatnate hrereng chunga ruahmanna a siam chu an lawm hle tih an sawi.
Sawrkarin a lo ruahman angin, a taka function ngei tur leh 2024 April 1 atanga hman tan theih tura thuchhuah chiangkuang tak leh felfai tak sawrkarin siam thuai turin an beisei a. Khawtlang mipui leh zirlai nu leh paten nghakhlel takin an thlir mek tih a sawi bawk.
‘Sawrkarin provisional adhoc status-a min hlankaina thu a puan atangin thla 4/5 dawn a nih tawh avangin khawtlang leh zirtirtute pawhin hmalam hun thui tak thlirin sawrkar hna thawk tur angin kan lo inngai tawh a, sawrkarin ruahmanna thui tak a siam vek tawh niin kan hria a, enthat ngai awm ang leh April 1-a function hman lo tur anga inhriatna kan neih avangin member-te zingah pawh rilru mangang leh chiai, mahni chanvo chan taa inngai leh beidawng engemawzat an awm a ni,’ a ti.
Kum 20 chuang khawtlangin a lo enkawl tawh leh zirtirtute pawh kum 10 bak service nei tawh lo thahnem tak an awm avangin, sawrkarin an dinhmun leh harsatna hriatsak a, dik tak leh fel taka April 1-a function hmana hma laksak turin an ngen tih a sawi a ni.