April 21-ah AMC inthlang dawn Sawkar hna kal lai a kal zel thei: – Election commissioner

On Mar 19, 2026 12 0

Aizawl Municipal Corporation inthlanpui 4-na chu 2026 April 21 hian neih a ni dawn a, inthlan puan a nih hun atangin he Municipal huamchhungah hian model code of conduct hman nghal a ni. State election commissioner Dr H Lalthlangliana chuan Nilaini khan AMC inthlan hun tur hi a puang a. Candidate nih tum tan March 25 chawhnu dar 3.00 thleng nomination paper a thehluh theih a, nomination paper hi March 27-ah endik a ni ang. Nomination paper thehlut zingah inhnukdawk leh duh tan March 30 chawhnu dar 3.00 ralhma in inhnuhdawh theih a ni.
April 21 zing dar 7.00 atanga tlai dar 5.00 thleng vote thlak theih a ni anga, inthlan that a ngaihna a awm a nih chuan April 23-ah inthlan that a ni anga, April 27 zing dar 8.00 atangin vote tla chhiar tan a ni ang. Inthlan kaihhnawih zawng zawng hi April 30 a zawh tawh tura ruat a ni.
State election commissioner chuan AMC inthlan huaihawt mai loh chungchangah rinthu sawi a tam a, State Election Commission chu amaha dan siama ama thua kal tur a ni a, tu political party mal emaw duh dana kal tur a ni loa, chutihrualin a tul angin party tin erawh rualkhaiin a rawn thin thung tih a sawi. Budget Session neih hun nen a innek buai thin avangin, innek buai tawh lo turin sawisel huamin, nakin zela a kal fuh zawkna atan hetiang hian ruahmanna an siam tih a sawi a ni.
Model code of conduct chu sawrkar hmalakna kal mek tibuai tur emaw titawp tur emaw a ni loa, chutihlaiin ruling party an ni emaw eptu party an ni emaw, hmingthat pui bik leh hlawkpui bik an awm loh a, rualkhai taka a huam theihnana puan thin a ni tih Dr H Lalthlangliana hian a sawi a. Tunah pawh sawrkar hna kal lai chu a ngaiin a kal reng thei a, chutihrualin party mal emaw mimal emaw hmingthatna bik awm theihna tur kha tih rih loh tur a ni mai tih a sawi a ni.
8 AMC huamchhungah hian local council/ veng 83 a awm a. Vote nei 237846 awmin, heng zinga 109376 hi mipa, 128470 hmeichhia an ni
8 AMC hnuaiah hian ward 19 a awm a. Tun tumah hian hmeichhe tana seat hauh bik chu ward 6 – II, IV, V, XI, XII leh XVII a ni.
8 Inthlanah hian electronic voting machine hman a ni dawn a. Vote tla hi Aizawl district bawrhsap pisa-a chhiar tum a ni.
8 Ward No. XVIII (Tuikhuahtlang, Mission Veng, Model Veng, Salem Veng, Dam Veng, Venghnuai, Thakthing, ITI Veng) chu voter tamna ber niin, voter 18906 an awm a, voter tlemna ber ward chu No.VIII (Armed Veng, Armed Veng South, Chite) niin 7975 an awm.