April 30-ah Sairang-Vairengte kawngpui zawh hman an tum

April 30-ah Sairang-Vairengte
kawngpui zawh hman an tum
ZPM consultant Er C Lianlunga leh ZPM Gen. Hqrs. secretary-ten Sairang atanga Vairengte inkar kawng siamthat hna an en a. Ministry of Transport & Highways hnuaia awm NHIDCL leh an hnuaia thawk contractor pathum – Balaji, BR Goyal leh J Infratech Private Limited (Jandu) ten an hmachhawp leh an harsatna an lo thlen.
Mizoram mipui châk lakna kawngpui pawimawh ber siamthat hna hi kumin April 30 hian contractor pathum hian zawh hman tumin, zawh hman ngei an inring tih an sawi.
“Buichali atanga Sairang Zero Point kawng thuam thleng cement concrete-a chhun hna bik meter 820 hna hi contractor Jandu hian February 11 atangin a tan a. A khuar hnawh mekin, km.11 resurfacing leh bitumen concrete chulmam hna hi April 30-ah zawh tum a ni,” tiin NHIDCL project manager Saksham Tyjia chuan a lo hrilh.
Kawnpui khawchhung, Aizawl chhuah lama kawng chhia leh khu lutuk chu Kawnpui VC-ten thu lo thlenin, NHIDCL leh contractor te nen sawiho nghal a ni a. A khu leh tlan harsa zualpui chu hnawh nghal turin contractor-in hma a la dawn a ni.
Buichali leh Khamrang inkara Jandu-in Hot Mix Plant an bun chu Mizoram Pollution Control Board-in an endik tawh a. MPCB hian hnathawh phalna a la pek loh avangin harsatna an tawk a, an harsatna hi ZPM team leader hian phone hmangin Forest minister Lalthansanga hnenah leh MPCB chairman hnenah a thlen nghal a ni.